ନୂଆଦିଲ୍ଲୀ …- ବିଜେପି ସାଂସଦ ଶୋଭା କରନଡ୍ଲାଜେଙ୍କ ଦରମା ଖାତାରୁ ୧୫ ଲକ୍ଷ ଟଙ୍କା ଉଭାନ ହୋଇଯାଇଥିବା ଅଭିଯୋଗ ହୋଇଛି । ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆରେ ଥିବା ତାଙ୍କ ଦରମା ଖାତାରୁ ୧୫ ଲକ୍ଷ ଟଙ୍କା କେହି ଉଠାଇ ନେଇଛି । ସେ ଗତ ସପ୍ତାହରେ ତାଙ୍କର ବ୍ୟାଙ୍କ ଖାତାକୁ ଅପଡେଟ୍ କରିବା ସମୟରେ ଏ ସମ୍ପର୍କରେ ଜାଣି ବାକୁ ପାଇଥିଲେ । ତାଙ୍କ ଆକାଉଣ୍ଟରୁ ଟଙ୍କା ଚାଲିଯାଇଥିଲେ ମଧ୍ୟ ତାଙ୍କୁ କୌଣସି ମେସେଜ୍(ସନ୍ଦେଶ) ମିଳି ନ ଥିବା ଶୋଭା ପ୍ରକାଶ କରିଛନ୍ତି ।
ନୂଆଦିଲ୍ଲୀରେ ଥିବା ସଂସଦ ଭବନ ଷ୍ଟେଟ୍ବ୍ୟାଙ୍କ ଶାଖାରେ ତାଙ୍କର ଏହି ଆକାଉଣ୍ଟ ରହିଛି । ଟଙ୍କା ଗାଏବ ହୋଇଯାଇଥିବା ବିଷୟରେ ଜାଣିବା ପରେ ଶୋଭା ସଂସଦ ଗଳିରେ ଥିବା ଥାନାରେ ଅଭିଯୋଗ କରିଛନ୍ତି । ପୁଲିସ ଏ ବିଷୟରେ ତଦନ୍ତ ଆରମ୍ଭ କରିଛି । ତାଙ୍କ ବ୍ୟାଙ୍କ ଖାତାରୁ ୧୫.୬୨ ଲକ୍ଷ ଟଙ୍କା ନ ଥିବା କଥା ଜଣା ପଡିଛି । ଏହି ମାମଲାକୁ ସାଇବର ସେଲ୍କୁ ହସ୍ତାନ୍ତର କରାଯିବ ବୋଲି ପୁଲିସ ସୂଚନା ଦେଇଛି । ଏହି ଖାତାରୁ କେଉଁ ଖାତାକୁ ଟଙ୍କା ଯାଇଛି ପୁଲିସ ସେ ବିଷୟରେ ତଦନ୍ତ କରୁଛି । ଦେଶ ଭିତରେ ନା ବାହାରରେ କୌଣସି ସାଇବର ଅପରାଧି ଏଥିରେ ସାମିଲ ଅଛନ୍ତି କି ନାହିଁ ପୁଲିସ ସେ ବିଷୟରେ ତଦନ୍ତ କରୁଛି । ଡେକାନ ହେରାଲ୍ଡ ଖବର ପ୍ରକାଶନ ସଂସ୍ଥାରେ ଏ ବିଷୟରେ ସବିଶେଷ ଖବର ପ୍ରକାଶିତ ହୋଇଛି ।
