ପାତ୍ରପୁର: ପାତ୍ରପୁର ତଳ ବସଷ୍ଟାଣ୍ଡରେ ଥିବା ଶୁଭମ ଷ୍ଟୋରରୁ ସୋମବାର ରାତିରେ ଦୋକାନ କବାଟ ତାଡ଼ି ଦୁଇଶହରୁ ଊର୍ଦ୍ଧ୍ବ ମୋବାଇଲ ଚୋରି ହୋଇଥିବା ପୁଲିସରେ ଅଭିଯୋଗ ହୋଇଛି। ଗତକାଲି ରାତିରେ ଦୋକାନ ବନ୍ଦ କରି ମାଲିକ ଯାଇଥିବା ବେଳେ ମଙ୍ଗଳବାର ସକାଳେ ଦୋକାନ ଖୋଲିବା ବେଳେ ଚୋରି ହୋଇଥିବା ଜାଣିବାକୁ ପାଇଥିଲେ। ଦୋକାନ ମାଲିକ ହର୍ଷ ପାଣିଗ୍ରାହୀ ଚୋରୀ ସମ୍ପର୍କରେ ଜରଡା ଥାନାରେ ଏତଲା ଦେଇଥିଲେ। ପୁଲିସ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଅପରାହ୍ନରେ ସନ୍ଧାନୀ କୁକୁର ସାହାଯ୍ୟରେ ତଦନ୍ତ ଚଳାଇଛି। ଚୋରମାନେ ଦୋକାନ ପଛପଟେ ଗ୍ରୀଲ ସହିତ ତିନୋଟି କବାଟ ଭାଙ୍ଗି ଜିନିଷ ଚୋରି କରି ନେଇଥିବା ବେଳେ ନିକଟ ମୁଣ୍ଡାକେରି ମନ୍ଦିର ନିକଟରେ ମୋବାଇଲ ଖୋଳ, ଚାର୍ଜର ଫିଙ୍ଗି ଦେଇଥିବା ଦେଖିବାକୁ ମିଳିଛି। ଏପରିକି କବାଟ ଭାଙ୍ଗିବା ପାଇଁ ବ୍ୟବହୃତ ସରଞ୍ଜାମ ଦୋକାନ ମଧ୍ୟରେ ଛାଡି ଚାଲି ଯାଇଛନ୍ତି। ଦୋକାନରୁ ତିରିଶି ଲକ୍ଷରୁ ଉର୍ଦ୍ଧ୍ବ ମୂଲ୍ୟର ମୋବାଇଲ ଚୋରି ହୋଇଥିବା ମାଲିକ ପ୍ରକାଶ କରିଛନ୍ତି। ତେବେ ମୁଖ୍ୟ ରାସ୍ତାରେ ଥିବା ଦୋକାନରୁ ଏତେ ପରିମାଣରେ ମୋବାଇଲ ଚୋରି ଘଟଣାରେ ସମ୍ପୃକ୍ତ ଚୋରଙ୍କୁ ଧରିବାକୁ ଦାବୀ ହେଉଛି।
Comments are closed.