ପାଟଣା : ଅନେକ ସମୟରେ ସୋସିଆଲ ମିଡିଆରେ ବିବାହକୁ ନେଇ ଅନେକ ଭିଡିଓ ଭାଇରାଲ ହେଉଥିବା ଦେଖାଯାଉଛି। ବିହାରର ରାଜଧାନୀ ପାଟଣାର ଏରଇ ଗାଁରେ ବିବାହ ସମୟରେ ଘଟିଥିବା ଏକ ଅଜବ ଘଟଣା ସାମ୍ନାକୁ ଆସିଛି। ବିବାହ ବରଣମାଳା ନୀତି ସମୟରେ ପ୍ରେମୀ ଜଣକ ବରଠାରୁ ବରଣମାଳା ନେଇ ପ୍ରେମିକାକୁ ପିନ୍ଧାଇବା ସହ ମଥାରେ ସିନ୍ଦୂର ପିନ୍ଧାଇଛନ୍ତି। ଏହାପରେ ସେଠାରେ ଥିବା ବ୍ୟକ୍ତିମାନେ ଷ୍ଟେଜ୍କୁ ଯାଇ ଉକ୍ତ ପ୍ରେମିକକୁ ଖୁବ ମାଡ ମାରିବା ସହ ପୁଲିସ ଜିମା ଦେଇଥିଲେ।
ସେହି ସମୟରେ କନ୍ୟା ଉକ୍ତ ଯୁବକକୁ ରକ୍ଷା କରିବାକୁ ଅନେକ ଚେଷ୍ଟା କରିଥିଲେ। ଏହାପରେ ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ। ଫଳରେ ଘଟଣା ଶାନ୍ତ ପଡିଥିଲା। ଘଟଣା ପରେ ବର ବରଯାତ୍ରୀଙ୍କୁ ନେଇ ଫେରି ଯାଇଥିବା ଦେଖାଯାଇଥିଲା। ସୂଚନାନୁଯାୟୀ ଯୁବତୀଙ୍କ ବାପା ନବାଦା ଜିଲାର ଜଣେ ଯୁବକଙ୍କ ସହ ବିବାହ ସ୍ଥିର କରିଥିଲେ। ବିବାହ ଦିନ ବରଯାତ୍ରୀଙ୍କ ସହ ବର ଆସି ପହଞ୍ଚିବା ପରେ ରାତି ପ୍ରାୟ ୧୧ଟା୧୨ରେ ବରଣମାଳାର ନୀତି ଆରମ୍ଭ ହୋଇଥିଲା। ବଧୂ ବେଶରେ ଉକ୍ତ ଯୁବତୀ ଷ୍ଟେଜ୍ ଉପରକୁ ଯିବା ମାତ୍ରେ ଖଗଡିଆ ନିବାସୀ (ଉକ୍ତ ଯୁବକ) ମଧ୍ୟ ଷ୍ଟେଜ୍କୁ ପଳାଇଥିଲେ। ଏହାପରେ ପ୍ରେମୀ ଜଣକ ବର ଠାରୁ ବରଣମାଳା ଛଡାଇ ଆଣି କନ୍ୟାକୁ ବରଣ ମାଳା ସହ ମଥାରେ ସିନ୍ଦୂର ପିନ୍ଧାଇଥିଲା। ପରେ ଯୁବତୀଙ୍କ ପରିବାର ପକ୍ଷରୁ ଥାନାରେ କୌଣସି ଲିଖିତ ଅଭିଯୋଗ କରାଯାଇନଥିବାରୁ ପୁଲିସ ଉକ୍ତ ଯୁବକଙ୍କୁ ଛାଡି ଦେଇଥିବା ନେଇ ସୂଚନା ମିଳିଛି।
