କେନ୍ଦୁଝର : ପାଖେଇ ଆସୁଛି ମକର ସଂକ୍ରାନ୍ତି। ଏଥିଲାଗି ଗାଁଠୁ ସହର ଉତ୍ସବମୂଖର ହୋଇଉଠିଛି । ଆଦିବାସୀବହୁଳ କେନ୍ଦୁଝର ଜିଲ୍ଲାର ମକର ହେଉଛି ଗଣପର୍ବ । ଆଦିବାସୀମାନେ ଏହାକୁ ୭ଦିନ ଧରି ପାଳନ କରିଥାନ୍ତି । ଆଦିବାସୀମାନେ ଘରଦ୍ୱାର ଲିପାପୋଛା କରିବା ସହ ବିଭିନ୍ନ ରଙ୍ଗରେ ଘରକୁ ସଜାଇଥାନ୍ତି । ମକର ପିଠା ଖାଇବା ସହ, ନାଚଗୀତ, ଖେଳକୁଦ କରି ସଭିଏଁ ମକର ପର୍ବର ଆନନ୍ଦ ଉଠାଇଥାନ୍ତି । ଘସିପୁରା ବ୍ଲକ ଅନ୍ତର୍ଗତ ଯୁଗଳକିଶୋରପୁର ଗାଁ ମକର ପାଇଁ ଏବେ ଚଳଚଞ୍ଚଳ ହୋଇଉଠିଛି।
କିଏ ଘରଦ୍ବାର ଲିପା ପୋଛା କରୁଛି ତ ଆଉ କିଏ ବିଭିନ୍ନ ରଙ୍ଗ ଦେଇ ଘରକୁ ଆକର୍ଷଣୀୟ ଢଙ୍ଗରେ ସଜାଇବାରେ ବ୍ୟସ୍ତ ରହିଛି। ବର୍ଷକରେ ଥରେ ମକର ପର୍ବ ପାଳନ ପାଇଁ ଲୋକଙ୍କର ଏହି ସାଜସଜ୍ଜା । ମକର ସଂକ୍ରାନ୍ତି ଏଠାରେ ୭ଦିନ ଧରି ବେଶ୍ ଧୁମଧାମ୍ ରେ ପାଳିତ ହୋଇଥାଏ ଘର ରଙ୍ଗଦେବା ପାଇଁ ଜଙ୍ଗଲରୁ ଲୋକେ ଲାଲ୍, ଧଳା, ହଳଦିଆ ମାଟି ସଂଗ୍ରହ କରିଥାନ୍ତି ।
ସେହି ମାଟିକୁ ପାଣିରେ ଭିଜାଇ ଘରକୁ ବିଭିନ୍ନ ପାରମ୍ପରିକ ଢଙ୍ଗରେ ସଜାଇଥାନ୍ତି । ଏଥିପାଇଁ ଆଦିବାସୀମାନେ କୌଣସି ରାସାୟନିକ ପଦାର୍ଥ ବ୍ୟବହାର କରନ୍ତି ନାହିଁ । ଏହି ପର୍ବ ପାଳନ ପାଇଁ ଘରକୁ କୁଣିଆ ଆସିବା ମଧ୍ୟ ଆରମ୍ଭ କରିଦେଲେଣି । ଏହି ଅବସରରେ ଗାଁ ଗାଁରେ ନାଚଗୀତ ଓ ଅନ୍ୟାନ୍ୟ ଖେଳକୁଦ ଅନୁଷ୍ଠିତ ହୋଇଥାଏ ।
Comments are closed.