ବଣାଇ : ବଣାଇ ଥାନା ଅନ୍ତର୍ଗତ ଉପରପଡା ଗ୍ରାମରେ ସ୍ପଷ୍ଟ ଦିବାଲୋକରେ ଘରେ ପଶି ଚୋରି ଅଭିଯୋଗ ସାରା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ବଣାଇ ସହର ସଂଲଗ୍ନ ଉପରପଡା ଗ୍ରାମର ଗଣେଶ ତ୍ରିପାଠୀ ଆଜି ନିଜ ପତ୍ନୀଙ୍କୁ ସ୍କୁଲରେ ଛାଡିବାକୁ ଯିବା ପରେ ଦୁର୍ବୃତ୍ତମାନେ ଘର ଗ୍ରୀଲ ଭାଙ୍ଗି ପ୍ରବେଶ କରିବା ସହ ନଗଦ ଦୁଇ ଲକ୍ଷ ଟଙ୍କା ସମେତ ପ୍ରାୟ କୋଡିଏ ଭରିରୁ ଉର୍ଦ୍ଧ୍ୱ ସୁନାଗହଣା ଚୋରି କରିନେଇଛନ୍ତି । ଆଶ୍ଚର୍ଯ୍ୟର କଥା ସମ୍ପୃକ୍ତ ଘର ଚତୁଃପାର୍ଶ୍ଵରେ ଜନବସତି ଥିବାବେଳେ କେହି ଏ ଘଟଣା ସମ୍ପର୍କରେ ଟେର ପାଇନଥିଲେ ।
ସୂଚନାରୁ ପ୍ରକାଶ ଯେ ଗଣେଶ ତ୍ରିପାଠୀ ଜଣେ ଅବସରପ୍ରାପ୍ତ ଶିକ୍ଷକ ଏବଂ ତାଙ୍କ ପତ୍ନୀ ମଧ୍ୟ ଶିକ୍ଷୟତ୍ରୀ । ପତ୍ନୀ ଏବେ ଭାଲୁଡୁଙ୍ଗୁରି ବିଦ୍ୟାଳୟରେ କାର୍ଯ୍ୟରତ ଥିବାରୁ ପ୍ରତିଦିନ ଗଣେଶ ତାଙ୍କୁ ସକାଳ ସାଢେ ନଅଟାରେ ଛାଡିବା ପାଇଁ ଯାଇ ପ୍ରାୟ ଏଗାରଟାବେଳେ ଫେରନ୍ତି । ଆଜି ମଧ୍ୟ ସେଇ କଥା ହୋଇଥିଲେ ହେଁ ସେ ଯିବା ପରେ ଦୁର୍ବୃତ୍ତମାନେ ଘରେ ପଶି କଳାକନା ବୁଲାଇ ଦେଇଛନ୍ତି । ଚୋରି ଯାଇଥିବା ଗହଣାର ଆନୁମାନିକ ମୂଲ୍ୟ ବାର ଲକ୍ଷ ଟଙ୍କାରୁ ଉର୍ଦ୍ଧ୍ୱ ହେବ ବୋଲି ଅଭିଯୋଗକାରୀ ସୂଚନା ଦେଇଛନ୍ତି । ଏ ସଂକ୍ରାନ୍ତରେ ଗୃହ କର୍ତ୍ତା ବଣାଇଁ ଥାନାରେ ଅଭିଯୋଗ କରିବା ପରେ ବଣାଇଁ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି ।
