ଫୁଲବାଣୀ: ସ୍ଥାନୀୟ ଫୁଲବାଣୀ ସାହିରେ ଥିବା ଏକ ଘରୋଇ ଫାଇନାନ୍ସ କମ୍ପାନୀ କାର୍ଯ୍ୟାଳୟରୁ ବୁଧବାର ବିଳମ୍ବିତ ରାତିରେ ଲୁଟ୍ ଉଦ୍ୟମ ହୋଇଛି। ଦୁର୍ବୃତ୍ତଙ୍କ ସହ ଧସ୍ତାଧସ୍ତିବେଳେ ଦୁଇ କର୍ମଚାରୀ ଆହତ ହୋଇଛନ୍ତି। ଘଟଣାରେ ଜଣଙ୍କୁ ପୁଲିସ ଅଟକ ରଖିଥିବାବେଳେ ଅନ୍ୟ ଦୁଇ ଜଣ ଫେରାର ହୋଇଯାଇଛନ୍ତି।
ସୂଚନା ପ୍ରକାରେ, ଅଧିକାର ଫାଇନାନ୍ସ କମ୍ପାନୀର ତିନିଜଣ କର୍ମଚାରୀ ୨ ଲକ୍ଷରୁ ଊର୍ଦ୍ଧ୍ବ ଋଣ ଟଙ୍କା ଆଦାୟ କରି କାର୍ଯ୍ୟାଳୟରେ ବସି ଗଣତି କରୁଥିବାବେଳେ ହଠାତ୍ ତିନି ଜଣ ମୁଖାଧାରୀ ପହଞ୍ଚିଥିଲେ। ଜଣେ କାର୍ଯ୍ୟାଳୟ ବାହାରେ ଥିବାବେଳେ ଅନ୍ୟ ଦୁଇଜଣ ଭିତରେ ପଶି କର୍ମଚାରୀଙ୍କ ମୁଣ୍ଡରେ ବନ୍ଧୁକ ଲଗାଇ ଟଙ୍କା ମାଗିଥିଲେ। କର୍ମଚାରୀମାନେ ଟଙ୍କା ନ ଦେବାରୁ ଦୁର୍ବୃତ୍ତଙ୍କ ସହ ଧସ୍ତାଧସ୍ତି ହୋଇଥିଲା। ଏଥିରେ ଦୁଇ କର୍ମଚାରୀ ଶ୍ରୀକାନ୍ତ ପ୍ରଧାନ ଓ ଲିଖନ ମଲ୍ଲିକ ଆହତ ହୋଇଛନ୍ତି। ସ୍ଥାନୀୟ ଲୋକେ ଜଣେ ଦୁର୍ବୃତ୍ତକୁ କାବୁ କରିବାରେ ସକ୍ଷମ ହୋଇଥିବାବେଳେ ଅନ୍ୟ ଦୁଇଜଣ ଘଟଣା ସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି। ଖବର ପାଇ ଟାଉନ ପୁଲିସ୍ ପହଞ୍ଚି ଆହତଙ୍କୁ ଚିକିତ୍ସା କରାଇବା ସହ ଜଣେ ଦୁର୍ବୃତ୍ତକୁ ଥାନାରେ ଅଟକ ରଖି ପଚରାଉଚରା କରୁଛି। ଘଟଣା ସ୍ଥଳରୁ ଗୋଟିଏ ବନ୍ଧୁ ଜବତ ହୋଇଛି। ତେବେ କେତେ ଟଙ୍କା ଲୁଟ୍ ହୋଇଛି ସେନେଇ ସ୍ପଷ୍ଟ ସୂଚନା ମିଳି ପାରିନାହିଁ। ଏନେଇ ଛାନଭିନ୍ ଚାଲିଥିବା ଥାନା ଅଧିକାରୀ କନକ କୁମାର ମାଝୀ ସୂଚନା ଦେଇଛନ୍ତି।
Comments are closed.