ଭୁବନେଶ୍ୱର : ଦି ନ୍ୟୁ ଇଣ୍ଡିଆନ୍ ଏକ୍ସପ୍ରେସ୍ ପକ୍ଷରୁ ଭୁବନେଶ୍ୱରରେ ଦୁଇ ଦିନିଆ ସାହିତ୍ୟ ମହୋତ୍ସବ ଉଦ୍ଘାଟିତ ହୋଇଯାଇଛି । ମୁଖ୍ୟ ଅତିଥି ଭାବେ ଯୋଗଦେଇ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଆନୁଷ୍ଠାନିକ ଭାବେ ଏହାକୁ ଉଦ୍ଘାଟନ କରିଥିଲେ। ଏହି ଅବସରରେ ରାଜ୍ୟପାଳ କହିଥିଲେ ଯେ ମଙ୍ଗଳ ଗ୍ରହରେ ଜୀବନର ସନ୍ଧାନ ଅପେକ୍ଷା ଜୀବନରେ ମଙ୍ଗଳର ସନ୍ଧାନ କରିବା ଆବଶ୍ୟକ। ବିଶ୍ୱରେ ଶାନ୍ତି ପ୍ରତିଷ୍ଠା ଏକାନ୍ତ ଆବଶ୍ୟକ ହୋଇ ପଡିଛି। ତେବେ ସମ୍ପ୍ରତି ଦେଶ ଦେଶ ମଧ୍ୟରେ ଯେଉଁଭଳି ଭାବେ ତିକ୍ତତା ବଢ଼ି ଚାଲିଛି ତାହା ଦୂର କରିବାରେ ଗଣମାଧ୍ୟମ ପ୍ରମୁଖ ଭୂମିକା ଗ୍ରହଣ କରି ପାରିବ। ଇଣ୍ଡିଆନ୍ ଏକ୍ସପ୍ରେସ୍ର ଗ୍ରୁପ୍ ଏଡିଟର୍ ପ୍ରଭୁ ଚାୱଲାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଦ୍ୱିତୀୟ ପର୍ଯ୍ୟାୟରେ ବରିଷ୍ଠ କଂଗ୍ରେସ୍ ନେତା ସଲମାନ୍ ଖୁର୍ସିଦ କହିଥିଲେ ଯେ ଲୋକେ ଧର୍ମକୁ ଅଧିକ ଗୁରୁତ୍ୱ ଦେଇଥାନ୍ତି। କିନ୍ତୁ ଆଇନ୍ ନାମରେ ଲୋକଙ୍କ ଉପରେ ଧର୍ମର ବୋଝକୁ ଲଦିଦେବା ଠିକ୍ ନୁହେଁ। ସାବରିମାଲା ମାମଲାରେ ସେ କହିଥିଲେ ଯେ ପ୍ରତ୍ୟେକ ନାଗରିକଙ୍କର ଧାର୍ମିକ ସ୍ୱାଧୀନତା ରହିଛି। ଏହା ଆସ୍ଥା ଓ ବିଶ୍ୱାସର ପ୍ରସଙ୍ଗ। ଏକଦା ସନ୍ଥ କବୀର ଧର୍ମକୁ ନେଇ ଦୁଇ ପ୍ରକାର ଆନ୍ଦୋଳନକୁ ଏକତ୍ର କରିବାର ଯେଉଁ ଉଦ୍ୟମ କରିଥିଲେ ତାହା ଆଜି ଦେଖିବାକୁ ମିଳୁନାହିଁ ବୋଲି ସେ କହିଥିଲେ। ସାଂସଦ ଚନ୍ଦନ ମିତ୍ର କହିଥିଲେ ଯେ ସର୍ବସାଧାରଣରେ ଧର୍ମ ଭାବନା ଜାହିର କରିବା ଜରୁରୀ ନୁହେଁ। ଏଥିପାଇଁ ଆସ୍ଥା ହିଁ ଯଥେଷ୍ଟ। ଅନ୍ୟତମ ଅତିଥି ଭାବେ ସାଂସଦ ରାକେଶ ସିହ୍ନା କହିଥିଲେ ଯେ ଧର୍ମ କେବଳ ଏହାର ପାଳନ କରୁଥିବା ଲୋକଙ୍କ ପାଇଁ ଉଦ୍ଦିଷ୍ଟ। କିନ୍ତୁ ରାଜନୈତିକ ଦଳ ଏହାକୁ ନିଜ ଫାଇଦା ପାଇଁ ବ୍ୟବହାର କରିବା ଉଚିତ୍ ନୁହେଁ। ଦି ନ୍ୟୁ ଇଣ୍ଡିଆନ୍ ଏକ୍ସପ୍ରେସ୍ର ଡେପୁଟି ରେସିଡେଣ୍ଟ ଏଡିଟର୍ ଶିବ ମହାନ୍ତି କାର୍ଯ୍ୟକ୍ରମ ସଂଯୋଜନା କରିଥିଲେ।
Popular Categories
Previous article
Next article