ବଲାଙ୍ଗିର -ବଲାଙ୍ଗିର ଲୋଇସିଂହା ବ୍ଲକ ଯୋଗିସୁର୍ଡା ଗାଁର ଚିତ୍ତରଞ୍ଜନ ମିଶ୍ର । ଛାତିରେ ଯନ୍ତ୍ରଣା ହେଉଥିଲା, ନିଶ୍ୱାସ ନେବାରେ ଅସୁବିଧା ଭୋଗୁଥିଲେ । ତେଣୁ ସଂପର୍କୀୟଙ୍କ ସହ ବୁଧୁବାର ବଲାଙ୍ଗିର ଭୀମ ଭୋଇ ଡାକ୍ତରଖାନାକୁ ଆସିଥିଲେ । ସଂପର୍କୀୟ ବର୍ହି ବିଭାଗ ପାଇଁ ଟିକେଟ କାଟି ଆଣିଥିଲେ । ଅନ୍ୟ ରୋଗୀମାନେ ଧାଡିରେ ଠିଆ ହୋଇଥିବାରୁ ଶ୍ରୀ ମିଶ୍ର ବି ଧାଡିରେ ଠିଆ ହୋଇଥିଲେ ।
ତେବେ କିଛି ସମୟ ଠିଆ ହେବା ପରେ ଅଚେତ ହୋଇ ସେ ପଡିଗଲେ ତଳେ । ସୁରକ୍ଷା କର୍ମୀଙ୍କ ପରାମର୍ଶରେ ତାଙ୍କୁ ଜରୁରୀକାଳୀନ ଚିକିତ୍ସାରେ ଥିବା ଡାକ୍ତରଙ୍କ ପାଖକୁ ନିଆଯାଇଥିଲା । ସେଠାରେ ଡାକ୍ତର ଶ୍ରୀ ମିଶ୍ରଙ୍କୁ ମୃତ ଘୋଷଣା କରିଥିଲେ । ଏହି ଘଟଣା ଜଣାପଡିବା ପରେ ଯୋଗିସୁର୍ଡା ଗାଁରେ ଶୋକ ପ୍ରକାଶ ପାଇଥିବା ବେଳେ ଏମିତି ବି ମୃତ୍ୟୁ ଆସେ ବୋଲି ଆଲୋଚନା ହେଉଛି ।
