ଫୁଲବାଣୀ: ବାଣିଜ୍ୟରେ ସର୍ବାଧିକ ପୁସ୍ତକ ରଚନା କରି ଇଣ୍ଡିଆ ବୁକ ଅଫ ରେକର୍ଡ୍ସରେ ସ୍ଥାନ ପାଇଛନ୍ତି ଫୁଲବାଣୀ ସରକାରୀ ଯୁକ୍ତ ଦୁଇ ମହାବିଦ୍ୟାଳୟ ଅଧ୍ୟକ୍ଷ ତଥା ଲେଖକ ଡା. ଜ୍ୟୋତି ପ୍ରକାଶ ରଥ। ଡା. ରଥ ବାଣିଜ୍ୟ ବିଭାଗରେ ଏଯାବତ୍ ୪୩ଟି ପୁସ୍ତକ ରଚନା କରି ଏହି ସମ୍ମାନର ଅଧିକାରୀ ହୋଇ ପାରିଛନ୍ତି । ଏହି ପରିପ୍ରେକ୍ଷୀରେ ଗତ ସେପ୍ଟେମ୍ବର ୫ ତାରିଖ ପବିତ୍ର ଗୁରୁଦିବସ ଅବସରରେ ତାଙ୍କୁ ସମ୍ମାନିତ କରାଯାଇଛି। ତାଙ୍କ ରଚିତ ପୁସ୍ତକ ଭାରତର ବିଭିନ୍ନ ରାଜ୍ୟର ଶିକ୍ଷା ବୋର୍ଡ଼ ଦ୍ବାରା ସ୍ବୀକୃତି ଲାଭ କରିଛି।
ଡା. ରଥ ବର୍ତ୍ତମାନ ଫୁଲବାଣୀ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟର ଅଧ୍ୟକ୍ଷ ଭାବେ କାର୍ଯ୍ୟରତ ଅଛନ୍ତି । ୧୫ ବର୍ଷରୁ ଊର୍ଦ୍ଧ୍ବ ସମୟ ଧରି ଶିକ୍ଷାଦାନ କରୁଥିବା ଡ. ରଥ ଜଣେ ଦକ୍ଷ ପ୍ରଶାସକ ଏବଂ ଲେଖକ ଭାବେ ଖ୍ୟାତି ଅର୍ଜନ କରିଛନ୍ତି। ପୂର୍ବରୁ ସେ ଲଣ୍ଡନ ବୁକ ଅଫ ରେକର୍ଡ୍ସ ସହିତ ଅନ୍ୟାନ୍ୟ ଜାତୀୟ ଏବଂ ଅର୍ନ୍ତଜାତୀୟ ପୁରସ୍କାର ମଧ୍ୟ ପାଇଛନ୍ତି। ତାଙ୍କର ଏହି କୃତିତ୍ବ ପାଇଁ ବିଭିନ୍ନ ମହଲରୁ ଅଭିନନ୍ଦନ ଓ ଶୁଭେଚ୍ଛାର ସୁଅ ଛୁଟୁଛି।
