ପାଟଣା : କେନ୍ଦୁଝର ଜିଲ୍ଲା ପାଟଣା ଥାନା ଅନ୍ତର୍ଗତ ଡିଆନାଳୀ ଗ୍ରାମର ଜଣେ ମହିଳା କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ନିକଟସ୍ଥ ଏକ ଗ୍ରାମକୁ କାମ କରିବା ପାଇଁ ଯାଇଥିବା ବେଳେ ଉକ୍ତ ମହିଳାଙ୍କ ସନ୍ଦେହଜନକ ମୃତ୍ୟୁ ଘଟିଛି । ସୂଚନା ଅନୁଯାୟୀ ପାଟଣା ଥାନା ଡିଆନାଳୀ ଗ୍ରାମର ବାବୁଲା ମୁଣ୍ଡା ଓ ସ୍ତ୍ରୀ ସୁକୁମାରୀ ମୁଣ୍ଡା ଓରଫ ମୁନୁ(୨୬) ତାଙ୍କ ତିନୋଟି ନାବାଳକ ଛୁଆଙ୍କୁ ନେଇ ଦିନ ମଜୁରିଆ ଭାବେ କାମ କରିବାକୁ ଯାଇଥିବାବେଳେ ସୁକୁମାରୀଙ୍କ ରବିବାର ଦିନ ସନ୍ଦେହ ଜନକ ଭାବେ ମୃତ୍ୟୁ ଘଟିଛି। କୌଣସି କାରଣରୁ ସେଠାରେ ପତି ପତ୍ନୀଙ୍କ ମଧ୍ୟରେ ଝଗଡ଼ା ହୋଇଥିବା ତାଙ୍କ ଘର ଲୋକଙ୍କଠାରୁ ସୂଚନା ମିଳିଛି। ସୁକୁମାରୀଙ୍କ ନିଜ ବାପ ଘର ସେଇ ଡିଆନାଳୀ ଗ୍ରାମରେ ହୋଇଥିବାବେଳେ ସେମାନେ ଖବର ପାଇବା ପରେ ଝିଅର ମର ଶରୀରକୁ ସେଠାରୁ ଡିଆନାଳୀ ଗ୍ରାମକୁ ଗତରାତି ନେଇ ଆସିଥିବାବେଳେ ଆଜି ସକାଳୁ ଘଟଣା ସମ୍ପର୍କରେ ପାଟଣା ପୁଲିସକୁ ସୂଚନା ଦେଇଥିଲେ। ଖବର ପାଇ ପାଟଣା ଥାନା ଏସଆଇ ଲକ୍ଷ୍ମଣ ମାଝୀ ଘଟଣାର ତଦନ୍ତ କରିବା ସହ ଏନେଇ ଥାନା ଅପମୃତ୍ୟୁ ମାମଲା ୭୫/୨୦୨୪ ମୂଳେ ଆଜି ପାଟଣାରେ ସୁକୁମାରୀଙ୍କ ଶବ ବ୍ୟବଚ୍ଛେଦ କରାଇଛନ୍ତି। ଶବ ବ୍ୟବଚ୍ଛେଦ ରିପୋର୍ଟ ତଥ୍ୟ ଆଧାରରେ ଆବଶ୍ୟକ ପଡିଲେ ମହାକାଳପଡ଼ା ଅଞ୍ଚଳରେ ଘଟଣାଟି ଘଟିଥିବାରୁ ସେଠାକାର ପୁଲିସକୁ ସୂଚନା ଦିଆଯିବ ବୋଲି ସୂଚନା ମିଳିଛି।
Comments are closed.