ଲଡୁଗାଁ: କୋକସରା ମୁଖ୍ୟାଳୟ ବସଷ୍ଟାଣ୍ଡ ବିଶ୍ରାମ ଗୃହ ଦୀର୍ଘଦିନରୁ ପରିତ୍ୟକ୍ତ ଅବସ୍ଥାରେ ପଡ଼ିରହିଥିଲା। ପୁଣି ୨୦୧୬ରେ ତାର ନବକଳେବର ହେଲା । ତତ୍କାଳୀନ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ପୁଷ୍ପେନ୍ଦ୍ର ସିଂଦେଓ ଉଦଘାଟନ କରିଥିବା ବେଳେ ସେ ସମୟର କଳାହାଣ୍ଡି ସାଂସଦ ଅର୍କ କେଶରୀ ଦେଓ, ବ୍ଲକ ଅଧ୍ୟକ୍ଷା ରାଜଶ୍ରୀ ପ୍ରଧାନୀ, ବିଡିଓ ରଘୁନାଥ ମୁଣ୍ଡାରୀ ମଧ୍ୟ ସମ୍ମାନୀତ ଅତିଥି ଭାବେ ଯୋଗ ଦେଇଥିଲେ । ଉଦଘାଟିତ ନାମଫଳକ ଆଜି ବି ଚକ୍ ଚକ୍ କରୁଛି । ନାମ ଫଳକ ଚକ୍ ଚକ୍ କରୁଛି ସତ, କିନ୍ତୁ ବିଶ୍ରାମ ଗୃହ ରକ୍ଷଣାବେକ୍ଷଣ ଅଭାବରୁ ଅବହେଳିତ ହୋଇପଡ଼ିଛି। ପଞ୍ଚାୟତ ଏହାର ରକ୍ଷଣାବେକ୍ଷଣ କରିବ କ’ଣ ଓଲଟି ବିଶ୍ରାମଗୃହ ଓ ଶୌଚାଳୟରେ ତାଲା ପକାଇ ଦେଇଥିଲା। ଯଦ୍ଵାରା ଲୋକେ ନାହିଁ ନଥିବା ଅସୁବିଧା ଭୋଗୁଥିବା ଅଭିଯୋଗ ହୋଇଛି । କିଛି ମାସ ତଳେ ଶୌଚାଳୟରେ ତାଲା ଝୁଲିବା ଓ ଯାତ୍ରୀ ସମସ୍ୟା ଦୃଷ୍ଟିକୋଣରୁ ସ୍ଥାନୀୟ ଯୁବକଙ୍କ ମଧ୍ୟରେ ଉତ୍ତେଜନା ଦେଖିବାକୁ ମିଳିଥିଲା । ଏହାପରେ ସ୍ଥିତି ଉପରେ ନିୟନ୍ତ୍ରଣ ରଖିବା ପାଇଁ ସରପଞ୍ଚ ତାଲା ଖୋଲି ଦେଇଥିଲେ । ପୁଣି ଯଥା ପୂର୍ବମ୍ ତଥା ପରମ୍ ପରିସ୍ଥିତି ସୃଷ୍ଟି ହୋଇଛି। ଶୌଚାଳୟ ଓ ବିଶ୍ରାମଗୃହରେ ତାଲା ଝୁଲୁଛି । ଦୈନନ୍ଦିନ ହଜାର ହଜାର ଯାତ୍ରୀ, ସ୍କୁଲ, କଲେଜ ଛାତ୍ରଛାତ୍ରୀ ଏହି ବିଶ୍ରାମଗୃହ ଉପରେ ନିର୍ଭର କରିଥାନ୍ତି। ଏବେ ଝଡ଼ି ବର୍ଷା ସମୟରେ ଯାତ୍ରୀମାନଙ୍କ ପାଇଁ ଏହି ବିଶ୍ରାମଗାର ଜରୁରୀ ହେଉଥିବା ବେଳେ ପାନୀୟ ଜଳ ଯୋଗାଣ ପାଇଁ ଫିଲ୍ଟର୍, ଶୌଚ ପାଇଁ ଶୌଚାଳୟ ସବୁ ଥାଇ ନଥିଲା ଭଳି ମନେହେଉଛି। ବସ୍ ଷ୍ଟାଣ୍ଡ ସମ୍ମୁଖରେ ଡ୍ରେନେଜ୍ ବ୍ୟବସ୍ଥା ବିପର୍ଯ୍ୟସ୍ତ ହୋଇ ବର୍ଷା ପାଣି ଜମି ରହୁଛି । ବିଶ୍ରାମ ଗୃହ ଦୂଆର ମୁହଁ ପାଦଚଲା ପ୍ଲେଟ୍ ଭାଙ୍ଗି ଯାଇଛି। ଯାହାଫଳରେ ଲୋକେ ଝୁଣ୍ଟି ପଡ଼ି କ୍ଷତାକ୍ତ ହେଉଥିବା କୁହନ୍ତି। କିଛିଦିନ ତଳେ ଉକ୍ତ ପଞ୍ଚାୟତରେ ପାନୀୟ ଜଳ ଯୋଗାଣ ବ୍ୟବସ୍ଥାରେ ଅନିୟମିତତାକୁ ନେଇ ଜନ ଅସନ୍ତୋଷ ବୃଦ୍ଧି ପାଇଥିଲା । ତେବେ ସରପଞ୍ଚଙ୍କ ମନମୁଖୀ କାର୍ଯ୍ୟ ଯୋଗୁ ପଞ୍ଚାୟତ ଉନ୍ନତି ଦିଗରେ କୌଣସି କାମ ସଠିକ୍ ଭାବରେ ହୋଇପାରୁନଥିବା ପଞ୍ଚାୟତବାସୀ ଅଭିଯୋଗ କରିଛନ୍ତି ।
Popular Categories
Previous article
Next article