ଉତ୍ତରପ୍ରଦେଶ: ମାଘପୂର୍ଣ୍ଣିମା ଉପଲକ୍ଷେ ଉତ୍ତରପ୍ରଦେଶ ପ୍ରୟାଗରାଜ୍ର କୁମ୍ଭଠାରେ ଭକ୍ତମାନେ ପବିତ୍ର ବୁଡ଼ ପକାଇଛନ୍ତି। କଳ୍ପବାସୀମାନଙ୍କ ପାଇଁ ଏହା ଶେଷ ସ୍ନାନ। କୁମ୍ଭଠାରେ ଏକମାସର ରହଣି ପରେ କଳ୍ପବାସୀମାନେ ସଂଗମରେ ପବିତ୍ର ସ୍ନାନ କରି ନିଜ ନିଜର ଘରକୁ ଫେରିଯିବେ। କୁମ୍ଭରେ ବୁଡ଼ ପକାଇବା ପାଇଁ ଶ୍ରଦ୍ଧାଳୁ ଓ ପର୍ଯ୍ୟଟକମାନେ ବିପୁଳ ସଂଖ୍ୟାରେ ପହଞ୍ଚିଛନ୍ତି। ମାଘପୂର୍ଣ୍ଣିମା ପରେ ମହାଶିବରାତ୍ରି ଦିନ ଆଉ ଏକ ପ୍ରମୁଖ ପବିତ୍ର ସ୍ନାନ ଉତ୍ସବ ଅନୁଷ୍ଠିତ ହୋଇଥାଏ। ପୁଲୁୱାମା ସନ୍ତ୍ରାସବାଦୀ ଆକ୍ରମଣ ଦୃଷ୍ଟିରୁ କୁମ୍ଭ ମେଳା ଚାରିପାଖରେ ସ୍ୱତନ୍ତ୍ର ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଇଛି। ଅତିରିକ୍ତ ଅର୍ଦ୍ଧସାମରିକ ବାହିନୀକୁ ମୁତୟନ କରାଯାଇଛି ଏବଂ ୩ ଦିନ ପାଇଁ ପ୍ରୟାଗରାଜର ସବୁ ବିଦ୍ୟାଳୟ ଗୁଡ଼ିକ ବନ୍ଦ ରଖାଯାଇଛି। ବହୁସଂଖ୍ୟାରେ ବିଦେଶୀ ଏହି ସ୍ନାନ ଉତ୍ସବରେ ଯୋଗଦେଇଛନ୍ତି। ସଂଗମ ଓ ଆଖପାଖ ସ୍ଥାନ ଗୁଡ଼ିକର ୮ କିଲୋମିଟର ପରିଧି ଭିତରେ ୪୦ଟି ସ୍ନାନଘାଟ ସ୍ଥାପନ କରାଯାଇଛି। ଜାନୁଆରୀ ୧୪ ପରଠାରୁ ଲକ୍ଷାଧିକ ଭକ୍ତ ସଙ୍ଗମରେ ବୁଡ଼ ପକାଇବା ପାଇଁ କୁମ୍ଭମେଳାରେ ଏକତ୍ରିତ ହୋଇଛନ୍ତି । ଏଥିରେ ପ୍ରଥମ ସାହି ସ୍ନାନ ଜାନୁଆରୀ ୧୫ ମକର ସଂକ୍ରାନ୍ତି, ଦ୍ଵିତୀୟ ସାହି ସ୍ନାନ ମୌନି ଅମାବାସ୍ୟା ଏବଂ ଶେଷ ସାହି ସ୍ନାନ ଫେବୃଆରୀ ୧୦ ବସନ୍ତ ପଞ୍ଚମୀଦିନ ଅନୁଷ୍ଠିତ ହୋଇଥିଲା। ମାର୍ଚ୍ଚ ୪ ତାରିଖରେ କୁମ୍ଭ ମେଳା ଶେଷ ହେବ।
Pay Online