କଲ୍ୟାଣସିଂହପୁର: ଦୁର୍ଗମ ଅଞ୍ଚଳରେ ପୁଣି ଜନନୀ ଯନ୍ତ୍ରଣାର ଚିତ୍ର ସାମ୍ନାକୁ ଆସିଛି। ଗାଁକୁ ଆମ୍ବୁଲାନ୍ସ ପହଞ୍ଚି ପାରିଲାନାହିଁ। ଫଳରେ ବାଟରେ ପ୍ରସବ କଲେ ମହିଳା। ୩ ଆମ୍ବୁଲାନ୍ସ କର୍ମଚାରୀ ଦୀର୍ଘ ତିନି କିଲୋମିଟର ପ୍ରସୂତୀଙ୍କୁ ବୋହି ବୋହି ଆମ୍ବୁଲାନ୍ସକୁ ଆଣିଥିଲେ।
ସୂଚନା ଅନୁଯାୟୀ, କଲ୍ୟାଣସିଂହପୁରୁ ବ୍ଲକ ପାର୍ସାଲି ପଞ୍ଚାୟତର ଦୁର୍ଗମ ନିୟମଗିରି ପାହାଡରେ ଥିବା ଫାକେରି ଗ୍ରାମର ମିଶ୍ର ଶିକକାଙ୍କ ପତ୍ନୀ ହୁଣ୍ଡାଇ ସିକକାଙ୍କ ଗର୍ଭ ଯନ୍ତ୍ରଣା ହେବାରୁ ପରିବାର ଲୋକେ ଆମ୍ବୁଲାନ୍ସକୁ ଫୋନରେ ଯୋଗାଯୋଗ କରିଥିଲେ। ଉକ୍ତ ଗାଁକୁ ରାସ୍ତା ନଥିବାରୁ ଆମ୍ବୁଲାନ୍ସ ପହଞ୍ଚି ପାରି ନଥିଲା। ହୁଣ୍ଡାଇ ଶିକକା ଗର୍ଭ ଯନ୍ତ୍ରଣା ସହ୍ୟ କରିପାରୁ ନ ଥିବାରୁ ପରିବାର ଓ ଗ୍ରାମବାସୀ ମିଳିତ ଭାବେ ଗ୍ରାମଠାରୁ ଅଧ କିମି ଦୂର ବାଟ ଆସିବା ପରେ ପ୍ରସବ କରିଥିଲେ। ଏହା ଦୁର୍ଗମ ଅଞ୍ଚଳ ହୋଇଥିବାରୁ ଆମ୍ବୁଲାନ୍ସ କର୍ମଚାରୀମାନେ ଚାଲିଚାଲି ଯାଇ ଘଟଣା ସ୍ଥଳରେ ପହଞ୍ଚିଥିଲେ। ସେତେବେଳକୁ ମହିଳା ଜଣକ ଏକ ଶିଶୁକନ୍ୟାକୁ ଜନ୍ମ ଦେଇ ସାରିଥିଲେ। ପ୍ରସବ ସ୍ଥଳରୁ ପ୍ରାୟ ୩କିମି ସ୍ୱାମୀ ମିଶ୍ର ଶିକକା ଓ ୩ ଆମ୍ବୁଲାନ୍ସ କର୍ମଚାରୀ ବୋହି ବୋହି ଆମ୍ବୁଲାନ୍ସକୁ ନେଇଥିଲେ। ଏହାପରେ କଲ୍ୟାଣସିଂହପୁର ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ବର୍ତ୍ତମାନ ମାଆ ସୁସ୍ଥ ଥିବା ବେଳେ ନବଜାତ ଶିଶୁ କନ୍ୟାର ଓଜନ କମ୍ ଓ ସ୍ବାସ୍ଥ୍ୟାବସ୍ଥା ଖରାପ ଥିବାରୁ ଜିଲା ସ୍ୱାସ୍ଥ୍ୟକେନ୍ଦ୍ରକୁ ପଠାଇଥିବା ଡାକ୍ତର ସତ୍ୟ ଦାସ ଓ ପ୍ରମୋଦ ମିଶ୍ର କହିଛନ୍ତି।
