ଲାଞ୍ଜିଗଡ: ବିଶୁଦ୍ଧ ପାନୀୟଜଳ ପହଞ୍ଚାଇବା ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରି ଜଳ ଯୋଗାଣ ପ୍ରକଳ୍ପ କରୁଛନ୍ତି ସତ, ହେଲେ ପ୍ରଶାସନିକ ଅବହେଳା ଯୋଗୁଁ ଉପାନ୍ତ ଅଞ୍ଚଳଗୁଡିକରେ ଏବେ ମଧ୍ୟ ପାନୀୟ ଜଳ ପାଇଁ ନାହିଁ ନ ଥିବା ଅସୁବିଧା ଭୋଗୁଛନ୍ତି ଲୋକେ। ଯାହା ଫଳରେ କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଅନ୍ତର୍ଗତ ବେନଗାଁ ଗ୍ରାମପଞ୍ଚାୟତ ସମ୍ମୁଖରେ ରାସ୍ତା ରୋକ କରିଛନ୍ତି ଗ୍ରାମବାସୀ। ପାନୀୟ ଜଳ ସମସ୍ୟାକୁ ନେଇଁ ବିଶ୍ୱନାଥପୁର ଓ ବିଜେପୁର ସଂଯୋଗ କରୁଥିବା ମୁଖ୍ୟ ରାସ୍ତାକୁ ଦୀର୍ଘ ୮ ଘଣ୍ଟା ଧରି ଅବରୋଧ କରିଛନ୍ତି ଗ୍ରାମବାସୀ। ବିଶ୍ଵନାଥପୁର ଶୁକ୍ରବାର ବଜାର ଦିନ ହୋଇଥିବାବେଳେ ଯାତାୟାତ ପୁରା ଠପ୍ ହୋଇଯାଇଥିଲା। ବେନଗାଁ ଗ୍ରାମବାସୀ ପୂର୍ବରୁ ମଧ୍ୟ ଏହି ପାନୀୟଜଳ ସମସ୍ୟାକୁ ନେଇଁ ପଞ୍ଚାୟତରୁ ଆରମ୍ଭ କରି ବ୍ଲକ ପ୍ରଶାସନ ପର୍ଯ୍ୟନ୍ତ ଅନେକ ଗୁହାରି ଆଉ ଅଭିଯୋଗ କରିବା ପରେ ପୁଣି ଥରେ ବ୍ଲକ କାର୍ଯ୍ୟାଳୟକୁ ଯାଇ ବିଡିଓଙ୍କୁ ଏକ ଲିଖିତ ଅଭିଯୋଗ କରିଥିଲେ। ଏମିତି ବାରମ୍ବାର ଅଭିଯୋଗ ପରେ ମଧ୍ୟ କୌଣସି ପ୍ରକାର ସମସ୍ୟାର ସମାଧାନ ନ ହେବାରୁ ବାଧ୍ୟ ହୋଇ ଶୁକ୍ରବାର ଗ୍ରାମବାସୀ ସମସ୍ତେ ବହୁ ସଂଖ୍ୟାରେ ଏକତ୍ରିତ ହୋଇ ବିଶ୍ୱନାଥପୁରଠାରୁ କଲ୍ୟାଣସିଂହପୁର ସଂଯୋଗ କରୁଥିବା ମୁଖ୍ୟ ରାସ୍ତାରେ ହାଣ୍ଡି, ଗରା, ବାଲଟି ରଖି ରାସ୍ତାରୋକ କରିଥିବା ଦେଖିବାକୁ ମିଳିଛି। ଏ ସମ୍ପର୍କରେ ଲାଞ୍ଜିଗଡ ବିଡିଓ ଶଶାଙ୍କ ପାତ୍ରଙ୍କୁ ପଚାରିବାରୁ ସେ କହିଲେ, ମୁଁ ଆରଡବ୍ଲ୍ୟୁଏସଏସ ଜେଇ ମୋହନ ଚରଣ ଶିଆଳଙ୍କୁ ଘଟଣା ସ୍ଥଳକୁ ତଦାରଖ ପାଇଁ ପଠାଇଛି। ତଦାରଖ ପରେ ତୁରନ୍ତ ସମସ୍ୟାର ସମାଧାନ କରାଯିବ ବୋଲି ବିଡିଓ ପ୍ରକାଶ କରିଥିଲେ। ଏହାପରେ ଘଟଣା ସ୍ଥଳକୁ ବେନଗାଁ ସରପଞ୍ଚ ଓ ଜେଇ ମୋହନ ଚରଣ ଶିଆଳ ପହଞ୍ଚି ଏକ ଲିଖିତ ପ୍ରତିଶୃତି ଦେଇ ବୁଝାସୁଜା କରିବାପରେ ରାସ୍ତାରୋକରୁ ହଟିଥିଲେ ଗ୍ରାମବାସୀ।
Comments are closed.