ପିପିଲି: ପିପିଲି ବ୍ଲକ ଅନ୍ତର୍ଗତ ଦାଣ୍ଡମୁକୁନ୍ଦପୁର ସ୍ଥିତ କଳିଙ୍ଗ ଛତୁ ଉଦ୍ୟୋଗକୁ ୩୦ଟି ଜିଲାର କୃଷି ଓ ବୈଷୟିକ ପରିଚାଳନା ସଂସ୍ଥା (ଆତ୍ମା)ର ପ୍ରକଳ୍ପ ଅଧିକାରୀ ଓ ସହକାରୀ ଅଧିକାରୀମାନେ ବୁଧବାର ପରିଦର୍ଶନ କରିଛନ୍ତି। ଉକ୍ତ ଛତୁ ଉଦ୍ୟୋଗର ସ୍ୱତାଧିକାରୀ ତଥା ଛତୁ ଚାଷୀ ସନ୍ତୋଷ କୁମାର ମିଶ୍ରଙ୍କ ନିରବଚ୍ଛିନ ଉଦ୍ୟମକୁ ସେମାନେ ଉଚ୍ଚ ପ୍ରଶଂସା କରିଛନ୍ତି। କୃଷି ଉଦ୍ୟୋଗ ପ୍ରତିଷ୍ଠା ପାଇଁ ହେଉଥିବା ଅସୁବିଧାର ଦୂରିକରଣ ପାଇଁ ଏହି ଅବସରରେ ବିଷଦ ଭାବେ ଆଲୋଚନା ହୋଇଛି। କଳିଙ୍ଗ ଛତୁ ଉଦ୍ୟୋଗକୁ ଏକ ରାଜ୍ୟସ୍ତରୀୟ ପ୍ରଶିକ୍ଷଣ କେନ୍ଦ୍ରରେ ରୂପାନ୍ତରିତ କରିବା ପାଇଁ କୃଷି ଅଧିକାରୀମାନେ ମତବ୍ୟକ୍ତ କରିଛନ୍ତି। ସମସ୍ତ କାର୍ଯ୍ୟକ୍ରମକୁ ଭୁବନେଶ୍ୱର ସ୍ଥିତ ଇମେଜ ପ୍ରଶିକ୍ଷଣ ସଂସ୍ଥାର ଅଧିକାରୀ ଲିଲିବାଳା ମହାପାତ୍ର ଓ ବିଭୁପ୍ରସାଦ ରଥ ପରିଚାଳନା କରିଥିବା ବେଳେ ପିପିଲି ବ୍ଲକ ଆତ୍ମା କାର୍ଯ୍ୟାଳୟର ଅଧିକାରୀମାନେ ସହଯୋଗ କରିଥିଲେ।
