ବିଚାରପତିଙ୍କ ପୁଅ ଓ ପତ୍ନୀଙ୍କୁ ଗୁଳି ମାଡ଼, ଜଣେ ଅଟକ

ଗୁରୁଗ୍ରାମ : ହରିୟାଣାର ଗୁରୁଗ୍ରାମ ସେକ୍ଟର-୫୧ ସ୍ଥିତ ବଜାରରେ ଶନିବାର ସନ୍ଧ୍ୟାରେ ଜଣେ ବିଚାରପତିଙ୍କ ପୁଅ ଏବଂ ପତ୍ନୀକୁ ଗୁଳି ମାରି ହତ୍ୟା ଉଦ୍ୟମ କରାଯାଇଛି। ଉଭୟଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି। ଏପର୍ଯ୍ୟନ୍ତ ଗୁଳି ମାଡ଼ର କାରଣ ଜଣାପଡିନାହିଁ। ପୁଲିସ୍‍ ଏହି ଘଟଣାରେ ଜଣଙ୍କୁ ଅଟକ ରଖି ପଚରାଉଚୁରା କରୁଥିବା ସୂଚନା ମିଳିଛି।
ବିଚାରପତିଙ୍କ ପୁଅ ଓ ପତ୍ନୀ ସନ୍ଧ୍ୟାରେ ସେକ୍ଟର-୫୧ସ୍ଥିତ ବଜାରକୁ କିଛି ଜିନିଷ କିଣିବାକୁ ଯାଉଥିଲେ। ସେଠାରେ ସେମାନେ ବୁଲାବୁଲି କରୁଥିବା ବେଳେ କେହି ଜଣେ ତାଙ୍କ ଉପରକୁ ଗୁଳି ମାଡ଼ କରିଥିଲା। ଗୁଳି ମାଡ଼ ପରେ ଦୁର୍ବୃତ୍ତ ଜଣକ ବନ୍ଧୁକ ଦେଖାଇ ସେଠାରୁ ଫେରାର ହୋଇଯାଇଥିଲା। ପୁଲିସ୍‍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଜଣଙ୍କୁ ଅଟକ ରଖି ପଚରାଉଚୁରା କରୁଛି। ଆହତଙ୍କ ଅବସ୍ଥା ସଂକଟାପନ୍ନ ଥିବା କୁହାଯାଉଛି।