ଯାଜପୁର : ଯାଜପୁର କଳିଙ୍ଗନଗର ମୈଥାନ ଇସ୍ପାତ କାରଖାନାରେ ଲାଗି ରହିଥିବା ଅଚଳାବସ୍ଥା ଦୂର ହେବ । ବିଗତ କିଛି ମାସ ଧରି କାରଖାନା ର ଶ୍ରମିକ ଓ କର୍ମଚାରୀ ଦରମା ନ ପାଇ ଆନ୍ଦୋଳନ କରିବା ଫଳରେ କାରଖାନା ସଂପୁର୍ଣ୍ଣ ବନ୍ଦ ହୋଇପଡିଥିଲା । ଜିଲା ପ୍ରଶାସନର ହସ୍ତକ୍ଷେପ ଫଳରେ ଏଭଳି ଅଚଳାବସ୍ଥା ଦୂର ହେବାକୁ ଯାଉଛି । ମଙ୍ଗଳବାର ଜିଲାପାଳ ରଂଜନ କୁମାର ଦାସଙ୍କ କାର୍ୟ୍ୟାଳୟ ପରିସରରେ କାରଖାନା କର୍ତୁପକ୍ଷ,ଶ୍ରମିକ ସଂଗଠନ କଳିଙ୍ଗନଗର ମଜଦୁର ୟୁନିଅନ ଏବଂ ପ୍ରଶାସନ ମଧ୍ୟରେ ଆଲୋଚନା ହୋଇଥିଲା । ଏଥିରେ ମୁଖ୍ୟତଃ ଶ୍ରମିକ ମାନଙ୍କ ବକେୟା ପାଉଣା ଏବଂ ବୋନସ ସଂକ୍ରାନ୍ତରେ ଉଚ୍ଚସ୍ତରୀୟ ଆଲୋଚନା କରାଯାଇଥିଲା । ଶ୍ରମିକ ୟୁନିଅନ ପକ୍ଷରୁ ପୂର୍ବତମ ମନ୍ତ୍ରୀ ପ୍ରପୁଂଲ୍ଲ ଚନ୍ଦ୍ର ଘଡେଇ ଶ୍ରମିକ ମାନଙ୍କ ବିଭିନ୍ନ ସମସ୍ୟା ସଂପର୍କରେ ଆଲୋଚନା କରିଥିଲେ ।
ତୁରନ୍ତ ଶ୍ରମିକ ମାନଙ୍କର ବକେୟା ପାଉଣା ପ୍ରଦାନ ପାଇଁ ଦାବି କରିଥିଲେ । କାରଖାନା ପକ୍ଷରୁ ନିର୍ଦ୍ଧେଶକ ସିପ୍ରା ସିଂ ଶ୍ରମିକ ମାନଙ୍କ ବକେୟା ପାଉଣା କିସ୍ତି ଆକାରରେ ପ୍ରଦାନ କରାଯିବ ବୋଲି ପ୍ରତିଶୃତି ଦେଇଥିଲେ । କାରଖାନା ଭଲ ସ୍ଥିତିକୁ ଆସିବା ପରେ ଶ୍ରମିକ ମାନଙ୍କର ସମସ୍ତ ଦାବି ପୁରଣ କରାଯିବ ବୋଲି ନିର୍ଦ୍ଧେଶକ କହିଥିଲେ । ଏହି ଆଲୋଚନାରେ କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ ମିଶ୍ର ସାମିଲ ହୋଇଥିଲେ । ପୂର୍ବରୁ ଶ୍ରମିକ ମାନଙ୍କର ସମସ୍ୟା ନେଇ ମଜଦୁର ୟୁନିଅନ କାରଖାନା ନିକଟରେ ରାସ୍ତାରୋକ କରିଥିଲା ଓ ପ୍ରଶାସନ ପକ୍ଷରୁ ଶ୍ରମିକ ମାନଙ୍କର ସମସ୍ୟା ସମାଧାନ ନେଇ ପ୍ରତିଶୃତି ଦିଆଯାଇଥିଲା ।
Comments are closed.