ନୂଆଦିଲ୍ଲୀ : ଜାମ୍ମୁ-କାଶ୍ମୀରରେ ସୁରକ୍ଷାବାହିନୀ ସହ ସଂଘର୍ଷରେ ଗତ ସାତ ମାସ ମଧ୍ୟରେ ୧୧୦ ଆତଙ୍କବାଦୀ ନିହତ ହୋଇଛନ୍ତି। ଏହି ସମୟ ମଧ୍ୟରେ ସୁରକ୍ଷାବାହିନୀର କାର୍ଯ୍ୟାନୁଷ୍ଠାନ ବେଳେ ୧୮ ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଛି ବୋଲି ରାଜ୍ୟସଭାରେ ସ୍ୱରାଷ୍ଟ୍ର ବ୍ୟାପାର ରାଷ୍ଟ୍ରମନ୍ତ୍ରୀ ହଂସରାଜ ଅହିର ସୂଚନା ଦେଇଛନ୍ତି। ତେବେ ଜାମ୍ମୁ-କାଶ୍ମୀରରେ ଇସ୍ଲାମିକ୍ ଷ୍ଟେଟ୍ସ (ଆଇଏସ୍) ଆତଙ୍କବାଦୀ ମୁକ୍ତ ହୋଇଛି ବୋଲି ସେ କହିଛନ୍ତି। ବିଗତ ଦିନରେ କାଶ୍ମୀର ଘାଟିରେ ଆତଙ୍କର ବାତାବରଣ ସୃଷ୍ଟି କରିଥିବା ଏହି ସଂଗଠନ ତଥା ପାକିସ୍ତାନୀ ପତାକା ଉତ୍ତୋଳନକାରୀ ଅସାମାଜିକ ଲୋକମାନଙ୍କ ବିରୋଧରେ କେନ୍ଦ୍ର ସରକାର ଆଇନଗତ ତଥା କଡ଼ା କାର୍ଯ୍ୟନୁଷ୍ଠାନ ଗ୍ରହଣ କରିଛନ୍ତି । ଏକ ବଡ଼ ସଫଳତା କ୍ରମେ ଭାରତୀୟ ସୁରକ୍ଷା ବାହିନୀ ଜୁନ୍ ୨୨ରେ ଅନନ୍ତନାଗର ଖିରମଠାରେ ୪ ଜଣ ଆତଙ୍କବାଦୀଙ୍କୁ ନିପାତ କରିଥିଲା। ଏଥିରେ ଆଇଏସ୍ଜେକେ ମୁଖ୍ୟ ଦାଉଦ୍ ଅହମ୍ମଦ ସୋଫ୍ ମଧ୍ୟ ପ୍ରାଣ ହରାଇଥିଲା।
ତେବେ ଜାମ୍ମୁ-କାଶ୍ମୀରରେ ୨୦୧୫ରେ ୧୦୮, ୨୦୧୬ରେ ୧୫୦ ଏବଂ ୨୦୧୭ରେ ୨୧୩ ଜଣ ଆତଙ୍କବାଦୀ ସୁରକ୍ଷା ବାହିନୀ ଗୁଳିରେ ପ୍ରାଣ ହରାଇଥିଲେ। ଏହି ସମୟ ମଧ୍ୟରେ ଯଥାକ୍ରମେ ୧୭, ୧୫ ଏବଂ ୪୦ ଜଣ ସାଧାରଣ ନାଗରିକ ପ୍ରାଣ ହରାଇଥିଲେ ବୋଲି ଅହିର କହିଛନ୍ତି।
