ହେଗ : ଅନ୍ତର୍ଜାତୀୟ ନ୍ୟାୟିକ ଅଦାଲତ (ଆଇସିଜେ) ଚଳିତ ମାସ ଶେଷ ସୁଦ୍ଧା ପାକିସ୍ତାନ ଜେଲରେ ବନ୍ଦୀ ଥିବା ଭାରତୀୟ ନାଗରିକ କୁଳଭୂଷଣ ଯାଦବଙ୍କ ମୃତ୍ୟୁଦଣ୍ଡ ଉପରେ ରହିତାଦେଶ ମାମଲାର ଚୂଡ଼ାନ୍ତ ରାୟ ପ୍ରକାଶ କରିପାରେ । ଏହା ଉପରେ ଭାରତ ଓ ପାକିସ୍ତାନ ସମେତ ବିଶ୍ବର ଅନେକ ଦେଶର ଦୃଷ୍ଟି ରହିଛି । ଚଳିତ ବର୍ଷ ଫେବୃଆରୀ ୧୮ରୁ ୨୧ ତାରିଖ ପର୍ଯ୍ୟନ୍ତ ଆଇସିଜେରେ ଏହି ମାମଲାର ଶୁଣାଣି ହୋଇଥିଲା ।
ନେଦରଲାଣ୍ଡସ୍ଥିତ ଦ ହେଗ୍ର ପିସ୍ ପ୍ୟାଲେସରେ ଫେବୃଆରୀ ୧୮ରେ ସକାଳ ଦିନ ୧୦ଟାରୁ ମଧ୍ୟାହ୍ନ ୧ଟା ପର୍ଯ୍ୟନ୍ତ ଭାରତ ଏବଂ ୧୯ ଫେବୃଆରୀ ମଙ୍ଗଳବାର ସକାଳ ୧୦ଟାରୁ ମଧ୍ୟାହ୍ନ ୧ଟା ପର୍ଯ୍ୟନ୍ତ ପାକିସ୍ତାନ ନିଜ ପକ୍ଷ ରଖିଥିଲେ । ଏହାପରେ ଫେବୃଆରୀ ୨୦ ବୁଧବାର ଅପରାହ୍ନ ୩ଟାରୁ ୪ଟା ୩୦ ପର୍ଯ୍ୟନ୍ତ ଭାରତ ଏବଂ ୨୧ ଫେବୃଆରୀ ଗୁରୁବାର ଅପରାହ୍ନ ୪ଟା ୩୦ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ପାକିସ୍ତାନ ନିଜ ପକ୍ଷ ରଖିଥିଲେ । ଉଭୟ ପକ୍ଷର ଯୁକ୍ତି ଓ ଦଲିଲ ଶୁଣିବା ପରେ ଆଇସିଜେ ନିଜ ରାୟ ସଂରକ୍ଷିତ ରଖିଥିବା କୁହାଯାଉଛି । ଏହି କ୍ରମରେ ଚଳିତ ମାସ ଶେଷ ସୁଦ୍ଧା ଚୂଡ଼ାନ୍ତ ରାୟ ପ୍ରକାଶ ପାଇବ ବୋଲି ବିଶେଷ ସୂତ୍ରରୁ ଜାଣିବାକୁ ମିଳିଛି ।
ଉଲ୍ଲେଖଯୋଗ୍ୟ ଯେ ଗୁପ୍ତଚର ଅଭିଯୋଗରେ ପାକିସ୍ତାନର ଏକ ସାମରିକ ଅଦାଲତ କୁଳଭୂଷଣଙ୍କୁ ମୃତ୍ୟୁଦଣ୍ଡାଦେଶ ଶୁଣାଇଛି। ଭାରତ ଏହି ରାୟ ବିରୋଧରେ ଆଇସିଜେର ଦ୍ୱାରସ୍ଥ ହେବା ପରେ କୁଳଭୂଷଣଙ୍କ ଦଣ୍ଡାଦେଶ ଉପରେ ରୋକ୍ ଲଗାଯାଇଛି।
