ହାଇଦ୍ରାବାଦ: ହାଇଦ୍ରାବାଦର ପ୍ରାଣୀ ଚିକିତ୍ସିକାଙ୍କୁ ଗଣବଳାତ୍କାର ଓ ହତ୍ୟା ମାମଲାରେ ଗିରଫ ହୋଇଥିବା ୪ ଜଣ ଅଭିଯୁକ୍ତଙ୍କୁ ପୁଲିସ ଶୁକ୍ରବାର ସକାଳେ ଏନକାଉଣ୍ଟର କରିଛି। ଆଜି ଅପରାହ୍ନରେ ହାଇଦ୍ରାବାଦର କମିଶନର ଭିସି ସଜ୍ଜନାର ଏକ ସାମ୍ବାଦିକ ସମ୍ମିଳନୀର ସବିଶେଷ ତଥ୍ୟ ପ୍ରଦାନ କରିଛନ୍ତି।
ସେ କହିଛନ୍ତି ଯେ, ଯେଉଁ ସ୍ଥାନରେ ପୀଡିତାଙ୍କୁ ହତ୍ୟା କରାଯାଇଥିଲା ତଦନ୍ତ ପାଇଁ ଅଭିଯୁକ୍ତମାନଙ୍କୁ ସେଠାକୁ ନିଆଯାଇଥିଲା। ସେଠାରେ ପହଞ୍ଚିଲା ପରେ ଅଭିଯୁକ୍ତମାନେ ପୁଲିସ ଉପରକୁ ଆକ୍ରମଣ କରିଥିଲେ। ପୁଲିସର ଦୁଇଟି ବନ୍ଧୁକ ଛଡାଇ ନେଇଥିଲେ। ଏହା ପରେ ବାଧ୍ୟ ହୋଇ ପୁଲିସ ଏନକାଉଣ୍ଟର କରିଥିଲା। ପୁଲିସ ଗୁଳିରେ ୪ ଅଭିଯୁକ୍ତଙ୍କ ମୃତ୍ୟୁ ହୋଇଛି। ଏହି ସମୟରେ ଏସଆଇ ଓ କନେଷ୍ଟବଲ ଆହତ ହୋଇଛନ୍ତି। ଏମାନେ ସମସ୍ତେ କର୍ଣ୍ଣାଟକ-ତେଲେଙ୍ଗାନାର କେତେକ ମାମଲାରେ ସଂପୃକ୍ତ ଥିବା ଜଣାପଡିଛି। ଶୁକ୍ରବାର ସକାଳ ୫.୪୫ରୁ ୬.୧୫ ମଧ୍ୟରେ ଏହି ଏନକାଉଣ୍ଟର କରାଯାଇଥିଲା। ଏନକାଉଣ୍ଟର ପରେ ସେମାନଙ୍କ ଡିଏନ୍ଏ ଚେଷ୍ଟା କରାଯାଇଛି।
