ଭୁବନେଶ୍ୱର: କୋଭିଡର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ଆରମ୍ଭ ହେବା ଦିନଠାରୁ ଖୋର୍ଦ୍ଧାଜିଲାରୁ କ୍ରମାଗତ ଭାବରେ ସବୁଠାରୁ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି। ସେଥିମଧ୍ୟରେ ଅଧିକାଂଶ ରାଜଧାନୀ ଭୁବନେଶ୍ୱରରୁ ଚିହ୍ନଟ ହେଉଛନ୍ତି। ଜନସାଧାରଣ ମାସ୍କ ପିନ୍ଧିବା, ବାରମ୍ବାର ହାତ ଧୋଇବା ଏବଂ ସାମାଜିକ ଦୂରତା ବଜାୟ ରଖିବାକୁ ସରକାରଙ୍କ ପକ୍ଷରୁ ବାରମ୍ବାର ଅନୁରୋଧ କରାଯାଉଛି। ଏପରିକି ନିୟମ ଭଙ୍ଗକାରୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ଚେତାବନୀ ଦିଆଯାଇଛି। କିନ୍ତୁ ଶୁକ୍ରବାର ଦିନ ରାଜଧାନୀର ୪ ନମ୍ବର ଆମିଷ ହାଟ ଏବଂ ବଡଗଡର ଆମିଷ ବଜାରକୁ ଦେଖିଲେ ସେଠାରେ କେହି ଜଣେହେଲେ କରୋନା ମହାମାରୀର ଭୟାବହତା ସଂପର୍କରେ ତିଳେହେଲେ ସଚେତନ ଥିବାଭଳି ମନେହେଉନଥିଲା। ଆଜି (ଶୁକ୍ରବାର) ରାତି ୯ଟାରୁ କର୍ଫ୍ୟୁ ଆରମ୍ଭ ହେଉଥିବାବେଳେ ଶନିବାର ଓ ରବିବାର ସଟ୍ଡାଉନ ରହୁଥିବାରୁ ବଡଗଡ ଆମିଷ ବଜାରରେ ନାହିଁ ନଥିବା ଭିଡ ପରିଲକ୍ଷିତ ହୋଇଥିଲା। ଏପରିକି ବଜାରରେ ପାଦ ପକାଇବାକୁ ଜାଗା ନଥିଲା। ଖୋଦ ରାଜଧାନୀରେ ଜନସାଧାରଣ କୋଭିଡ ନିୟମକୁ ଏଭଳି ଖୋଲାଖୋଲି ଉଲ୍ଲଂଘନ କରୁଥିବାବେଳେ ସେମାନଙ୍କ ବିରୁଦ୍ଧରେ ଦଣ୍ଡବିଧାନ ତ ଦୂରର କଥା, ସେମାନଙ୍କୁ ଅନ୍ତତଃପକ୍ଷେ ସେଠାରୁ ଘଉଡାଇବାକୁ ଜଣେ ହେଲେ ପୁଲିସ ନଥିଲେ।
Comments are closed.