ନୂଆଦିଲ୍ଲୀ: ଆସନ୍ତା ସାଧାରଣ ନିର୍ବାଚନ ପୂର୍ବରୁ ଉପସ୍ଥାପିତ ହେବାକୁ ଯାଉଥିବା ମୋଦୀ ସରକାରଙ୍କ ଶେଷ ବଜେଟ୍ରେ ସ୍ୱାସ୍ଥ୍ୟ ସେବା ପାଇଁ ୨୦୧୭-୧୮ ଆର୍ଥିକ ବର୍ଷ ତୁଳନାରେ ଅଧିକ ୫% ବ୍ୟୟ ବରାଦ ହେବ। ଏଥିସହିତ ସମଗ୍ର ଦେଶରେ ଅତିରିକ୍ତ ୫ ହଜାର ସ୍ୱାସ୍ଥ୍ୟ କେନ୍ଦ୍ର ପ୍ରତିଷ୍ଠା ହେବ। ସେହି ସବୁ ସ୍ୱାସ୍ଥ୍ୟକେନ୍ଦ୍ରରେ ମାଗଣା ସ୍ୱାସ୍ଥ୍ୟ ସେବା ଓ ନିଦାନ ସହିତ ମାଗଣା ଔଷଧ ଉପଲବ୍ଧ ହେବ। ୨୦୧୭-୧୮ରେ ସ୍ୱାସ୍ଥ୍ୟ କ୍ଷେତ୍ର ପାଇଁ ୫୨,୮୦୦ କୋଟି ଟଙ୍କାର ବ୍ୟୟ ବରାଦ ହୋଇଥିଲା।
ପ୍ରଧାନମନ୍ତ୍ରୀ ଜନଆରୋଗ୍ୟ ଯୋଜନା ବା ଆୟୁଷ୍ମାନ ଭାରତ ଯୋଜନାର ଆଦୃତି ପରେ ମୋଦୀ ସରକାର ଏହାକୁ ପରିବର୍ଦ୍ଧନ କରିବାକୁ ଯୋଜନା କରୁଛନ୍ତି। ଏହି ଆଧାରରେ ଦେଶର ବିଭିନ୍ନ ଅଞ୍ଚଳରେ ‘ହେଲ୍ଥ ଆଣ୍ଡ ୱେଲନେସ୍’ ସେଣ୍ଟର ସ୍ଥାପନା ହେବ। ଏଥିସହିତ ଉଭୟ ସରକାରୀ ଓ ବେସରକାରୀ କ୍ଷେତ୍ରରେ ଟ୍ରମା ଓ ଆଶୁ ଚିକିତ୍ସା ସେବାକୁ ଅଧିକ ଦକ୍ଷ କରିବା ପାଇଁ କେନ୍ଦ୍ର ସରକାର ବଜେଟରେ ବ୍ୟବସ୍ଥା କରିବେ ବୋଲି ଜଣାପଡ଼ିଛି।
