ବାରଣାସୀ : ବାରଣାସୀର ଜିଲ୍ଲା କୋର୍ଟରେ ଜ୍ଞାନବ୍ୟାପୀ ମାମଲାରେ ବଡ ନିଷ୍ପତ୍ତି ଆସିଛି । ଜ୍ଞାନବ୍ୟାପୀର ବ୍ୟାସ ପରିସରରେ ହିନ୍ଦୁ ପକ୍ଷଙ୍କୁ ପୂଜା କରିବାକୁ ଅଧିକାର ଦିଆଯାଇଛି । କୋର୍ଟ ଜିଲ୍ଲା ପ୍ରଶାସନକୁ ୭ ଦିନ ଭିତରେ ବ୍ୟବସ୍ଥା କରାଇବାକୁ ନିର୍ଦ୍ଦେଶ ମଧ୍ୟ ଦେଇଛନ୍ତି । ଏହି ବେସମେଣ୍ଟ ମସଜିଦ୍ ତଳେ ରହିଛି ।
ଏଣିକି ଏଠାରେ ଦୈନନ୍ଦିନ ପୂଜାର୍ଚ୍ଚନା ହେବ । କାଶୀ ବିଶ୍ବନାଥ ଟ୍ରଷ୍ଟ ବୋର୍ଡ ତରଫରୁ ପୁଜା କରାଯିବ । ୩୦ ବର୍ଷ ଭିତରେ ନ୍ୟାୟ ମିଳିଥିବାରୁ ଏହା ବଡ ବିଜୟ ବୋଲି କହିଛନ୍ତି ହିନ୍ଦୁ ପକ୍ଷ । ନଭେମ୍ବର ୧୯୯୩ ପର୍ଯ୍ୟନ୍ତ ଏଠାରେ ପୁଜାର୍ଚ୍ଚନା କରାଯାଉଥିଲା । କହିରଖୁଛୁ ବାରଣାସୀର ଜ୍ଞାନବ୍ୟାପୀ ପରିସର ସ୍ଥିତ ବ୍ୟାସ ବେସମେଣ୍ଟରେ ପୂଜା ଅଧିକାର ଦେବା ଦାବିରେ ଶୈଳେନ୍ଦ୍ର କୁମାର ପାଠକଙ୍କ ଯାଚିକାରେ ଗତକାଲି ଶୁଣାଣି ପରେ କୋର୍ଟଙ୍କ ଆଦେଶ ସୁରକ୍ଷିତ ରଖାଯାଇଥିଲା । ଏନେଇ ଆଜି ଶୁଣାଣି ହୋଇଛି ।
ଅନ୍ୟପଟେ ମୁସଲିମ୍ ପକ୍ଷଙ୍କ ଓକିଲ ଅଖଲାକ ଅହମଦ କହିଛନ୍ତି କି ଏହି ନିଷ୍ପତ୍ତି ଭୁଲ୍ । ପୂର୍ବ ନିର୍ଦ୍ଦେଶକୁ ନଜରକୁ ନନେଇ ଏହି ଆଦେଶ ଦିଆଯାଇଛି । ଏହା ବିରୁଦ୍ଧରେ ସେ ହାଇକୋର୍ଟ ଯିବେ ବୋଲି କହିଛନ୍ତି । ତେବେ ଏନେଇ ହିନ୍ଦୁ ପକ୍ଷଙ୍କ ଓକିଲ ବିଷ୍ଣୁ ଶଙ୍କର ଜୈନ କହିଛନ୍ତି କି ପୂଜା ୭ ଦିନ ଭିତରେ ଆରମ୍ଭ ହେବ । ସମସ୍ତଙ୍କର ପୂଜା କରିବାର ଅଧିକାର ରହିଛି । ମୁସଲିମ୍ ପକ୍ଷ ପ୍ଲେସ୍ ଅଫ୍ ଓର୍ସିପ୍ ଆକ୍ଟ ଅନୁସାରେ ଯାଚିକାକୁ ଖାରଜ କରିବାକୁ ଦାବି କରିଥିଲା । କିନ୍ତୁ କୋର୍ଟ ମୁସଲିମ୍ ପକ୍ଷଙ୍କ ଯାଚିକାକୁ ଅସ୍ବୀକାର କରି ହିନ୍ଦୁ ପକ୍ଷଙ୍କୁ ଜ୍ଞାନବ୍ୟାପୀର ବ୍ୟାସ ପରିସରରେ ପୂଜା କରିବାର ଅଧିକାର ଦେଇଛନ୍ତି ।
