ଅହମଦାବାଦ: ଗୁଜରାଟରେ ଅଦିନିଆ ବର୍ଷା କାରଣରୁ ବଜ୍ରପାତ ହୋଇ ପ୍ରାୟ ୨୦ ଜଣଙ୍କର ମୃତ୍ୟୁ ଘଟିଥିବା ନେଇ ସୋବାର ଖବର ମିଳିଛି। ଏହି ଅଘଟଣରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ଗଭୀର ଶୋକ ପ୍ରକାଶ କରିଛନ୍ତି।
ଗୁଜରାଟର ଦାହୋଦରେ ସର୍ବାଧିକ ୪ ଜଣଙ୍କ ମୃତ୍ୟୁ ଘଟିଛି। ଭରୁଚରେ ୩, ତାପିରେ ୨ ଓ ଅହମଦାବାଦ, ଅମରେଲୀ, ବନସ୍କାଥା, ବୋତଡ, ଖେଡା, ମେହସାଣା, ପଞ୍ଚମହଲ, ସବରକାନ୍ଥା, ସୁରତ, ସୁରେନ୍ଦ୍ରନଗର, ଦେବଭୂମି ଦ୍ୱାରକାରେ ଜଣେ ଲେଖାଏଁ ବ୍ୟକ୍ତିଙ୍କ ମୃତ୍ୟୁ ଘଟିଛି।
ଅଧିକାରୀଙ୍କ କହିବାନୁଯାୟୀ, ଫସଲ ନଷ୍ଟ ହୋଇଛି। ଏହାସହ ସୌରାଷ୍ଟ୍ରର ମୋର୍ବି ଜିଲାରେ ପ୍ରବଳ ବର୍ଷା ହେତୁ କାରଖାନା ବନ୍ଦ ଥିବାରୁ ଅନେକ କ୍ଷୟକ୍ଷତି ହୋଇଛି।
ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନାନୁଯାୟୀ, ସୋମବାର ବର୍ଷାର ପରିମାଣ କମ୍ ରହିବ। ଗୁଜରାଟ ଏବଂ ସୌରାଷ୍ଟ୍ରର ଦକ୍ଷିଣ ଅଞ୍ଚଳରେ ବର୍ଷା ସୀମିତ ରହିବ। ଉତ୍ତର-ପୂର୍ବ ଆରବ ସାଗରରେ ସୃଷ୍ଟ ଘୂର୍ଣ୍ଣିବଳୟ ସୌରାଷ୍ଟ୍ର ଏବଂ କୁଚ୍ ଅଞ୍ଚଳକୁ ପ୍ରଭାବିତ କରିବା ସହ ଏହି ଅଦିନିଆ ବର୍ଷାର କାରଣ ପାଲଟିଛି।
