ନୂଆଦିଲ୍ଲୀ : ରାଫେଲ କାରବାର ସମ୍ବନ୍ଧୀୟ ସିଏଜି (କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ)ଙ୍କ ରିପୋର୍ଟ ପିଏସି (ପବ୍ଲିକ୍ ଆକାଉଣ୍ଟ କମିଟି)କୁ ପ୍ରଦାନ କରାଯାଇଛି ବୋଲି ସୁପ୍ରିମକୋର୍ଟ କହିଛନ୍ତି। ମାତ୍ର ପିଏସିକୁ ଏହି ରିପୋର୍ଟ ମିଳିନାହିଁ। ରାଜସ୍ଥାନର ନେତୃତ୍ୱ ସମସ୍ୟା ସମାଧାନ କରିବା ପରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଶୁକ୍ରବାର ସନ୍ଧ୍ୟାରେ ସୁପ୍ରିମକୋର୍ଟଙ୍କ ରାଫେଲ ରାୟ ଉପରେ ପ୍ରତିକ୍ରିୟା ପ୍ରକାଶ କରି ଏହା କହିଛନ୍ତି। ସେ କହିଛନ୍ତି ବାସ୍ତବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଧାରଣ ଲୋକଙ୍କ ନିକଟରେ ଧରାପଡିବାକୁ ଚାହୁଁ ନାହାନ୍ତି। ୫୨୬ କୋଟି ଟଙ୍କାର ବିମାନ କାହିଁକି ୧୬୦୦ କୋଟି ଟଙ୍କାରେ କ୍ରୟ କରାଯାଉଛି। ରାଫେଲ କାରବାରର ଅଫ୍ସେଟ୍ ଅଂଶୀଦାର ହାଲ (ହିନ୍ଦୁସ୍ତାନ ଏରୋନଟିକସ ଲିମିଟେଡ)କୁ କାହିଁକି ପ୍ରଦାନ କରା ନ ଗଲା ବୋଲି ରାହୁଲ ପ୍ରଶ୍ନ ଉଠାଇଛନ୍ତି। ବିଜେପି ନେତୃତ୍ୱାଧୀନ ଏନ୍ଡିଏ ସରକାର ସମୟରେ ହୋଇଥିବା ରାଫେଲ କାରବାର ସମ୍ବନ୍ଧୀ ଚୁକ୍ତି ବେଳେ ଫ୍ରାନ୍ସରେ ବାସ୍ତବରେ କ’ଣ ଘଟିଥିଲା ତାହା କେବଳ ମୋଦୀ ଜାଣନ୍ତି। ଏହାର ତଦନ୍ତ ହେଲେ ଦୁଇଟି ନାମ ପଦାକୁ ଆସିବ। ଗୋଟିଏ ନରେନ୍ଦ୍ର ମୋଦୀ ଏବଂ ଅନ୍ୟଟି ଅନୀଲ ଅମ୍ବାନୀ ବୋଲି ରାହୁଲ ଦର୍ଶାଇଛନ୍ତି। ଏଥିସହ ସେ ପୁନର୍ବାର ଦେଶର ଚୌକିଦାର ଚୋର ବୋଲି କହିଛନ୍ତି। ଦେଶରେ ବେରୋଜଗାରୀ ବୃଦ୍ଧି ପାଉଥିବା ବେଳେ ସମସ୍ତ ବିମାନ ନିର୍ମାଣ କରିବାକୁ କାହିଁକି ଫ୍ରାନ୍ସକୁ କୁହାଗଲା ବୋଲି ମଧ୍ୟ ସେ ପ୍ରଶ୍ନ କରିଛନ୍ତି। ମୋଦୀ ସରକାରଙ୍କୁ ଏସବୁ ପ୍ରଶ୍ନର ଉତ୍ତର ଦେବାକୁ ହେବ ବୋଲି ରାହୁଲ କହିଛନ୍ତି।
