ନୂଆଦିଲ୍ଲୀ : ୨୦୧୬ ଅଗଷ୍ଟ ୫ରେ ଜାରି ହୋଇଥିବା ଶୋଭରେନ ସୁନା ବଣ୍ଡ୍ ୨୦୨୪ ଅଗଷ୍ଟ ୫ରେ ପରିପକ୍ବ(ମାଚୁରିଟି) ହେବ। ୮ବର୍ଷ ପରେ ଏହି ବଣ୍ଡ୍ ପରିପକ୍ବ ହେଉଛି। ନିବେଶକ ଏହା ଉପରେ ବାର୍ଷିକ ୧୨% ସୁଧ ପାଇବେ। ତେବେ ଅନ୍ୟ ସମାନ ବିପଦ ପ୍ରୋଫାଇଲର ସମ୍ପତ୍ତି ଶ୍ରେଣୀ ଅପେକ୍ଷା ଏହି ରିଟର୍ଣ୍ଣ ଭଲ ବୋଲି ଜଣେ ସରକାରୀ ଅଧିକାରୀ କହିଛନ୍ତି।
୨୦୧୫ ନଭେମ୍ବରରେ ଜାରି ଏହି ଶୋଭରେନ ସୁନା ବଣ୍ଡ୍ ଯୋଜନା ଭୌତ୍ତିକ ସୁନା କ୍ଷେତ୍ରରେ ଏକ ସୁରକ୍ଷିତ ଏବଂ ସୁବିଧାଜନକ ବିକଳ୍ପ ଭାବରେ ପ୍ରସ୍ତୁତ କରାଯାଇଥିଲା। ଏହି ଯୋଜନା ନିବେଶକଙ୍କୁ ଭୌତିକ ସୁନାକୁ ସୁରକ୍ଷିତ ରଖିବା ଚିନ୍ତାରୁ ମୁକ୍ତ କରିଥାଏ। ଏହି ବଣ୍ଡ୍ ଉପରେ ବାର୍ଷିକ ୨.୭୫% ସୁଧ ପ୍ରତି ୬ ମାସରେ ମିଳିଥାଏ। ୨୦୨୪ ଅଗଷ୍ଟ ୫ରେ ପରିପକ୍ବ ହେଉଥିବା ଏହି ବଣ୍ଡରେ ସୁନା ଗ୍ରାମ ପ୍ରତି ୩ ହଜାର ଶହେ ୧୯ ଟଙ୍କା ମୂଲ୍ୟରେ ଜାରି ହୋଇଥିଲା। ତେବେ ଏହି ୮ ବର୍ଷ ମଧ୍ୟରେ ସୁନା ମୂଲ୍ୟ ବହୁ ଅସ୍ଥିର ରହିଥିବାରୁ ବଣ୍ଡ ପରିପକ୍ବର ୩ଦିନ ପୂର୍ବରୁ ଥିବା ୯୯୯ ଶୁଦ୍ଧ ସୁନାର ହାରାହାରି ମୂଲ୍ୟ ନିର୍ଦ୍ଧାରଣ କରାଯିବ। ୧୨ ମାସରୁ ଅଧିକ ଦିନ ପର୍ଯ୍ୟନ୍ତ ଶୋଭରେନ ସୁନା ବଣ୍ଡ୍ ଥିଲେ ଏହା ଦୀର୍ଘକାଳୀନ ଅର୍ଥ ସଞ୍ଚୟ ଶ୍ରେଣୀରେ ଯିବ। ତେଣୁ ୨୦୨୪ ଜୁଲାଇ ୨୩ ପରେ ସୁନା ବଣ୍ଡରୁ ମିଳିବାକୁ ଥିବା ସୁଧ ଉପରେ ନୂତନ ନିୟମ ଅନୁଯାୟୀ ୧୨.୫% ଟିକସ ଲାଗିବ।
ଉଭୟ ଅନ୍ଲାଇନ ଓ ଅଫ୍ଲାଇନରେ ଶୋଭରେନ ସୁନା ବଣ୍ଡ୍ ପାଇଁ ଆବେଦନ କରିହେବ। ଡିମାଟ ଆକାଉଣ୍ଟ ଥିଲେ ଏଥିପାଇଁ ଅନ୍ଲାଇନରେ ଆବେଦନ କରିହେବ। ଏଥିସହ ନେଟ୍ ବ୍ୟାଙ୍କିଂ ଥିଲେ ମଧ୍ୟ ଆର୍ବିଆଇର ୱେବ୍ସାଇଟ କିମ୍ବା ନିଜ ବ୍ୟାଙ୍କ ପୋର୍ଟାଲରେ ମଧ୍ୟ ଆବେଦନ କରିହେବ। ସେହିପରି ବ୍ୟାଙ୍କ ଓ ପୋଷ୍ଟ ଅଫିସ୍ରେ ମଧ୍ୟ ଆବଶ୍ୟକ କାଗଜପତ୍ର ଓ ନିବେଶ ଅର୍ଥ ଦେଇ ଅଫ୍ଲାଇନ୍ ମୋଡ୍ରେ ଶୋଭରେନ ସୁନା ବଣ୍ଡ୍ ପାଇଁ ଆବେଦନ କରିହେବ।
କୃତ୍ରିମ ବୁଦ୍ଧିମତା କ୍ଷେତ୍ରରେ ଭାରତ ସବୁଠାରୁ ବଡ ବଜାର – ମାର୍କ ଜୁକରବର୍ଗ
