ଖପ୍ରାଖୋଲ : ଖପ୍ରାଖୋଲ ବ୍ଲକ ମହରାପଦର ପଞ୍ଚାୟତ ଅନ୍ତର୍ଗତ ସର୍ଗିପାଲି ଗ୍ରାମରେ ଜଣେ ବ୍ୟକ୍ତିଙ୍କ ଧାନ ଖଳାରେ ନିଆଁ ଲାଗି ପ୍ରାୟ ୩ଶହ କ୍ୱିଣ୍ଟାଲ ଧାନ ପୋଡି ପାଉଁଶ ହୋଇଯାଇଛି। କିଛିଦିନ ପୂର୍ବେ ନିକଟସ୍ଥ ଚାଉଳବାଞ୍ଜି ଗ୍ରାମରେ ଜଣେ ବ୍ୟକ୍ତିଙ୍କ ଧାନ ଗଦାରେ ନିଆଁ ଲାଗିଯିବା ଯୋଗୁଁ ଲକ୍ଷାଧିକ ଟଙ୍କାର ଧାନ ପୋଡି ପାଉଁଶ ହୋଇଯାଇଥିଲା। କ୍ଷେତ ହଳ କରିବାଠାରୁ ଫସଲ ଅମଳ ପରେ ତାହା ପୋଡି ପାଉଁଶ ହେବାର ଦୁଃଖ କେବଳ ଚାଷୀ ବୁଝେ। ତେଣୁ ସ୍ଥାନୀୟ ଚାଷୀମାନେ ମଧ୍ୟ ଭୟଭୀତ ହୋଇପଡିଛନ୍ତି।
ସର୍ଗିପାଲି ଗ୍ରାମର ଯୁଧିଷ୍ଠିର ମେହେରଙ୍କ ବନ୍ଦେପଦର ରାସ୍ତାରେ ଧାନ ଖଳା ରହିଥିବାବେଳେ ସେ ନିକଟରେ ଧାନ କାଟି ଆଣି ସେଠାରେ ରଖିଥିଲେ। ଗତ ରାତିରେ ତାଙ୍କ ଧାନ ଗଦାରେ କେହି ଦୁର୍ବୃତ୍ତ ନିଆଁ ଲଗାଇ ଦେଇଥିଲେ। ଧାନ ଖଳାରେ ନିଆ ଲାଗିଥିବା ନେଇ ଶ୍ରୀ ମେହେର ଗ୍ରାମବାସୀଙ୍କଠାରୁ ସକାଳେ ଖବର ପାଇଥିଲେ। ଖପ୍ରାଖୋଲରୁ ଅଗ୍ନିଶମ ବାହିନୀ ମଧ୍ୟ ଦମକଳ ଗାଡ଼ି ଧରି ଘଟଣାସ୍ଥଳରେ ପହଞ୍ଚିଥିଲା। ଅଗ୍ନିଶମ ବାହିନୀର କର୍ମଚାରୀଙ୍କ ଦୀର୍ଘ ସମୟ ଚେଷ୍ଟା ପରେ ନିଆଁ ଆୟତ୍ତ ହୋଇଥିଲା। ଧାନ ଗଦାଟି ସମ୍ପୂର୍ଣ୍ଣ ଜଳି ପୋଡି ପାଉଁଶ ହୋଇଯାଇଥିବାବେଳେ ଏଥିରେ ପ୍ରାୟ ୩ଶହ କ୍ୱିଣ୍ଟାଲ ଧାନ ପୋଡି ଯାଇଥିବା ଜଣାପଡିଛି। ଯୁଧିଷ୍ଠିର ଧାନ ଚାଷ କରିବା ପାଇଁ ୨ ଲକ୍ଷ ଟଙ୍କା ଋଣ କରିଥିବାବେଳେ ଏବେ ସେ ଋଣ କିପରି ପରିଶୋଧ କରିବେ ତାକୁ ନେଇ ଚିନ୍ତାରେ। ପ୍ରଶାସନ କ୍ଷୟକ୍ଷତି ଆକଳନ କରି ଶ୍ରୀ ମେହେରଙ୍କୁ କ୍ଷତିପୂରଣ ଦେବା ସହିତ ନିଆଁ ଲଗାଇଥିବା ଦୁର୍ବୃତ୍ତକୁ ଗିରଫ କରିବା ପାଇଁ ମହରାପଦର ସରପଞ୍ଚ ନଳିନୀ ମେହେର ଦାବି କରିଛନ୍ତି।
