ବ୍ରସଲେସ : କାଶ୍ମୀର ପ୍ରସଙ୍ଗକୁ ଅନ୍ତର୍ଜାତୀୟକରଣ କରିବା ପାଇଁ ପାକିସ୍ତାନର ସ୍ୱପ୍ନ ପୁଣି ଥରେ ଭାଙ୍ଗଯାଇଛି। ୟୁରୋପୀୟ ୟୁନିଅନ ବୁଧବାର ପାକିସ୍ତାନକୁ ଏକ ଶକ୍ତ ଝଟକା ଦେଇଛି। କାଶ୍ମୀର ପ୍ରସଙ୍ଗରେ ୟୁରୋପୀୟ ୟୁନିୟନ ସଂସଦର ଅଧିକାଂଶ ସଦସ୍ୟ ଭାରତକୁ ସମର୍ଥନ ଦେବା ସହ ପାକିସ୍ତାନକୁ ଏକ ସନ୍ଦିଗ୍ଧ ଦେଶ ବୋଲି କହିଛନ୍ତି।
ୟୁରୋପୀୟ ୟୁନିଅନର ସଂସଦ ସ୍ପଷ୍ଟ କରିଛି ଯେ କାଶ୍ମୀର ହେଉଛି ଭାରତ ଓ ପାକିସ୍ତାନ ମଧ୍ୟରେ ଦ୍ୱିପାକ୍ଷିକ ପ୍ରସଙ୍ଗ। ଦୁଇ ଦେଶର କଥାବାର୍ତ୍ତା ଦ୍ୱାରା କାଶ୍ମୀର ପ୍ରସଙ୍ଗର ଶାନ୍ତିପୂର୍ଣ୍ଣ ସମାଧାନ ସୁନିଶ୍ଚିତ ହୋଇପାରିବ। ଏହି ମାମଲାରେ କୌଣସି ତୃତୀୟ ପକ୍ଷଙ୍କ ହସ୍ତକ୍ଷେପର କୌଣସି ପ୍ରଶ୍ନ ଉଠୁନାହିଁ ବୋଲି ୟୁରୋପୀୟ ସଂସଦର ସଦସ୍ୟମାନେ କହିଛନ୍ତି। ତେବେ ୧୧ ବର୍ଷ ପରେ ପ୍ରଥମ ଥର ୟୁରୋପୀୟ ସଂସଦରେ କାଶ୍ମୀର ପ୍ରସଙ୍ଗରେ ଚର୍ଚ୍ଚା ହୋଇଛି। ଆଲୋଚନାକାଳରେ ୟୁରୋପୀୟ ୟୁନିଅନରେ ପୋଲାଣ୍ଡର ରିଜାର୍ଡ ଜାରନେକି କହିଥିଲେ ଯେ ଭାରତ ହେଉଛି ବିଶ୍ୱର ସବୁଠୁ ବଡ଼ ଲୋକତନ୍ତ୍ର। ଆମକୁ ଭାରତର ଜାମ୍ମୁ କାଶ୍ମୀରରେ ହେଉଥିବା ଆତଙ୍କବାଦୀ ଆକ୍ରମଣ ଉପରେ ଧ୍ୟାନ ଦେବା ଆବଶ୍ୟକ। ଭାରତକୁ ଆତଙ୍କବାଦୀମାନେ ଚନ୍ଦ୍ରରୁ ଆସୁନାହାନ୍ତି ସେମାନେ ପଡୋଶୀ ଦେଶରୁ ହିଁ ଆସୁଛନ୍ତି। ତେଣୁ ଆମକୁ ଭାରତକୁ ସମର୍ଥନ କରିବା ଦରକାର। ସେହିପରି ୟୁରୋପୀୟ ୟୁନିଅନରେ ଇଟାଲିର ଫୁଲଭାୟୋ ମାର୍ତସିଲୋ କହିଥିଲେ ଯେ ପାକିସ୍ତାନ ବାରମ୍ବାର ପରମାଣୁ ଅସ୍ତ୍ର ବ୍ୟବହାର କରିବାର ଧମକ ଦେଉଛି। ପାକିସ୍ତାନରୁ ଆତଙ୍କବାଦୀମାନେ ଆସି ୟୁରୋପରେ ଆକ୍ରମଣ କରିବାର ଯୋଜନା କରିବାରେ ସଫଳ ହେଉଛନ୍ତି। ଏହା ମନାବାଧିକାରର ବଡ଼ ଉଲ୍ଲଙ୍ଘନ ଓ ଏଥିପାଇଁ ପାକିସ୍ତାନକୁ ଦାୟୀ କରାଯିବା ଉଚିତ।
