ନୂଆଦିଲ୍ଲୀ: ଗୋଆରୁ ଆସୁଥିବା ସ୍ପାଇସଜେଟ୍ର ଏକ ବିମାନ ବୁଧବାର ରାତିରେ ହାଇଦ୍ରାବାଦ ବିମାନବନ୍ଦରରେ ଜରୁରୀକାଳୀନ ଅବତରଣ କରିଛି। ଘଟଣା ସମ୍ପର୍କରେ ସୂଚନା ଦେଇ ଡିଜିସିଏ ଅଧିକାରୀ କହିଛନ୍ତି ଘଟଣାର ତଦନ୍ତ ଚାଲିଛି। ଅଧିକାରୀମାନେ କହିଛନ୍ତି ଯେ, ବିମାନର କ୍ୟାବିନରେ ଧୂଆଁ ଦେଖାଯିବା ପରେ ବୁଧବାର ବିଳମ୍ବିତ ରାତିରେ ବିମାନର ଜରୁରୀ ଅବତରଣ କରାଯାଇଥିଲା।
ଡିଜିସିଏ ପକ୍ଷରୁ ମିଳିଥିବା ସୂଚନା ଅନୁସାରେ, ବିମାନଟି ସୁରକ୍ଷିତ ଅବତରଣ କରିବା ପରେ ଯାତ୍ରୀମାନଙ୍କୁ ଜରୁରୀକାଳୀନ ପ୍ରସ୍ଥାନ ପଟେ ବାହାର କରାଯାଇଥିଲା। ଏହି ସମୟରେ ଜଣେ ଯାତ୍ରୀଙ୍କ ଗୋଡ଼ରେ ସାମାନ୍ୟ ଆଘାତ ଲାଗିଥିଲା। ହାଇଦ୍ରାବାଦ ବିମାନବନ୍ଦର ଅଧିକାରୀଙ୍କ କହିବାନୁଯାୟୀ, Q400 ବିମାନ VT-SQBରେ ୮୦ ଜଣ ଯାତ୍ରୀ ଥିଲେ। ଏହି ଘଟଣା ରାତି ପ୍ରାୟ ୧୧ଟା ସମୟରେ ଘଟିଥିଲା। ସ୍ପାଇସଜେଟ୍ର ଏହି ବିମାନ ଗୋଆରୁ ରାତି ୯ଟା ୫୫ ସମୟରେ ଉଡ଼ାଣ ଭରିଥିଲା ଓ ରାତି ୧୧ଟା ୩୦ ସମୟରେ ହାଇଦ୍ରାବାଦରେ ଅବତରଣ କରିବାର ଥିଲା। କିନ୍ତୁ ଏହାର ଠିକ୍ ପୂର୍ବରୁ ପାଇଲଟ୍ କକ୍ପିଟ୍ରେ ଧୂଆଁ ଦେଖିଥିଲେ।
ଏହି ଘଟଣା ଯାତ୍ରୀଙ୍କ ମଧ୍ୟରେ ଆତଙ୍କ ସୃଷ୍ଟି କରିଥିଲା ଏବଂ ଧୂଆଁ ଯୋଗୁଁ ଜଣେ ମହିଳା ଯାତ୍ରୀ ଅସୁସ୍ଥ ହୋଇପଡିଥିଲେ। ଜରୁରୀକାଳୀନ ଅବତରଣ ଯୋଗୁ ୯ଟି ବିମାନକୁ ଅନ୍ୟ ସହରକୁ ସ୍ଥାନାନ୍ତର କରିବାକୁ ପଡିଲା। ସେଥିମଧ୍ୟରୁ ୬ଟି ଘରୋଇ ବିମାନ, ଦୁଇଟି ଅନ୍ତର୍ଜାତୀୟ ବିମାନ ଏବଂ ଗୋଟିଏ କାର୍ଗୋ ବିମାନକୁ ଡାଇଭର୍ଟ କରାଯାଇଥିଲା।
