ପାଟଣା: ଗତ ୩/୪ ଦିନ ହେଲା ଘଟଗାଁ ବନାଞ୍ଚଳ ସାନ ମସିଣାବିଲା ଜଙ୍ଗଲରେ ଡେରା ପକାଇଛି ଏକ ଦନ୍ତା ହାତୀ। ସୋମବାର ସନ୍ଧ୍ୟାରେ ଲଙ୍ଗଳକଣ୍ଟି ହୋଇ ଢେଙ୍କିକୋଟ ଅଞ୍ଚଳକୁ ପଶି ଆସିବା ଫଳରେ ସାଧାରଣ ଲୋକେ ଭୟଭୀତ ହୋଇଯାଇଥିବା ବେଳେ ବାଣ ଫୁଟାଇ ହାତୀ ପଲକୁ ଘଉଡାଇବାକୁ ମଧ୍ୟ ଚେଷ୍ଟା କରିଥିଲେ। ମଙ୍ଗଳବାର ସନ୍ଧ୍ୟାରେ ମଧ୍ୟ ସାନମସିଣାବିଲା ଜଙ୍ଗଲରେ ଏହି ହାତୀଟି ଥିବା ଢେଙ୍କିକୋଟ ବନପାଳ ଚିତ୍ତରଞ୍ଜନ ପରିଡା ସୂଚନା ଦେଇଛନ୍ତି।
ସୂଚନାଯୋଗ୍ୟ, ଢେଙ୍କିକୋଟ ବଜାର ଅଞ୍ଚଳରେ ଘର କରି ରହୁଥିବା ମୁରଲୀଧର ସାହୁଙ୍କ ପାଚେରୀ ଭାଙ୍ଗିବାକୁ ଉଦ୍ୟମ କରୁଥିବାବେଳେ ହାତୀକୁ ଘଉଡ଼ାଇ ଦିଆ ଯାଇଥିଲା। ଏହି ହାତୀଟି ୪ ଦିନ ମଧ୍ୟରେ ସାନମସିଣାବିଲା ଛକ ଢ଼ାବା ପଛପଟେ ଗୋଟିଏ ଘରକୁ ୨ ଥର ଭାଙ୍ଗି ଦେଇଥିବାବେଳେ ସାନବରବେଡାରେ ମଧ୍ୟ ଗୋଟିଏ ଦୋକାନ ଭାଙ୍ଗିଛି। ସେହିପରି ମୀନା ମୁଣ୍ଡାଙ୍କ ଘର ମଧ୍ୟ ହାତୀ ଆକ୍ରମଣରେ ଆଂଶିକ ଭାଙ୍ଗିଥିବାବେଳେ ପଞ୍ଚାନନ ମୁଣ୍ଡାଙ୍କ ଘର ଭାଙ୍ଗି ହାତୀଟି ଧାନ ଓ ଚାଉଳ ଖାଇଥିବା ଅଭିଯୋଗ ହୋଇଥିଲା।
