କାଇରୋ : ଇଜିପ୍ଟର ପୂର୍ବତନ ରାଷ୍ଟ୍ରପତି ହୋସ୍ନି ମୁବାରକଙ୍କର ମଙ୍ଗଳବାର ପରଲୋକ ହୋଇଯାଇଛି। ତାଙ୍କୁ ୯୧ବର୍ଷ ହୋଇଥିଲା। ଆରବ ସ୍ପ୍ରିଙ୍ଗ୍ ବିଦ୍ରୋହ ଯୋଗୁ ୨୦୧୧ ଫେବୃଆରୀରେ କ୍ଷମତାଚ୍ୟୁତ ହୋଇଥିବା ମୁବାରକ ୧୯୮୧ରୁ ୨୦୧୧ ପର୍ଯ୍ୟନ୍ତ ଦୀର୍ଘ ତିନି ଦଶନ୍ଧି ଧରି ଦେଶର ନେତୃତ୍ବ ନେଇଥିଲେ। ରାଷ୍ଟ୍ରପତି ଅନୱର ଏଲ-ସଦାତଙ୍କୁ ହତ୍ୟା ପରେ ରାଷ୍ଟ୍ରପତି ପଦ ଅକ୍ତିଆର କରିଥିବା ମୁବାରକଙ୍କ ନେତୃତ୍ବ ସମଗ୍ର ମଧ୍ୟପ୍ରାଚ୍ୟରେ ପ୍ରଭାବଶାଳୀ ଥିଲା। ଆମେରିକାର ବନ୍ଧୁ ଓ ଇସ୍ଲାମିକ୍ ଆତଙ୍କବାଦର ବିରୋଧୀ ଏବଂ ସର୍ବୋପରି ଇସ୍ରାଏଲ ସହିତ ଇଜିପ୍ଟର ଶାନ୍ତି ରାଜିନାମାର ସେ ନାୟକ ଥିଲେ। ତେବେ ଟୁନିସିଆ ସହଯୋଗରେ ଆରମ୍ଭ ହୋଇଥିବା ଆରବ ସ୍ପ୍ରିଙ୍ଗ୍ (ଆନ୍ଦୋଳନ)କୁ ଦମନ କରିବାକୁ ଯାଇ ତାଙ୍କ ଶାସନ କାଳରେ ୯୦୦ରୁ ଅଧିକ ବିକ୍ଷୋଭକାରୀଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ତାଙ୍କ ସରକାର ବିରୋଧରେ ଦାରିଦ୍ର୍ୟ ଓ ଦୁର୍ନୀତି ବୃଦ୍ଧିର ଅଭିଯୋଗ ରହିଥିଲା। ଦେଶର ନ୍ୟାୟାଳୟ ତାଙ୍କୁ ଓ ତତ୍କାଳୀନ ସୁରକ୍ଷା ମୁଖ୍ୟଙ୍କୁ ୨୦୧୨ରେ ଆଜୀବନ କରାଦଣ୍ଡାଦେଶ ଦେଇଥିଲେ। ସେ ପ୍ରଥମେ କାରାଗାର ଓ ପରେ ସାମରିକ ହସ୍ପିଟାଲରେ ରହିଥିଲେ। ୨୦୧୭ ମାର୍ଚ୍ଚରେ ମୁବାରକଙ୍କୁ ଅଭିଯୋଗରୁ ମୁକ୍ତ କରାଯାଇଥିଲା। ଗତ ବର୍ଷ ଅକ୍ଟୋବରରେ ସେ ଶେଷଥର ପାଇଁ ଏକ ଭିଡିଓ ମାଧ୍ୟମରେ ସର୍ବସାଧାରଣରେ ଆତ୍ମପ୍ରକାଶ କରିଥିଲେ। ଏଥିରେ ୧୯୭୩ ଇସ୍ରାଏଲ ଯୁଦ୍ଧଠାରୁ ଆରମ୍ଭ କରି ସମସ୍ତ ସ୍ମୃତି ରୋମନ୍ଥନ କରିଥିଲେ।
ଇଜିପ୍ଟର ପୂର୍ବତନ ରାଷ୍ଟ୍ରପତି ହୋସ୍ନି ମୁବାରକଙ୍କ ପରଲୋକ
Popular Categories
Previous article
Next article