ଗୋପାଳପୁର: କୋଲକାତାରୁ ଆସିଥିବା ଏକ ପରିବାର ସମୁଦ୍ରରେ ସ୍ନାନ କରିବା ସମୟରେ ସ୍ରୋତରେ ଭାସି ଯାଉଥିବା ବେଳେ ବେଳାଭୂମିରେ ନିୟୋଜିତ ଲାଇଫ ଗାର୍ଡ ଓ ସ୍ଥାନୀୟ ଦୋକାନୀଙ୍କ ସହାୟତା ରେ ଦୁଇ ଅମୂଲ୍ୟ ଜୀବନ ବଞ୍ଚିଯାଇଥିବା ଜଣାପଡ଼ିଛି। କୋଲକାତାରୁ ପ୍ରଦୀପ କୁମାର ଦତ୍ତ ତାଙ୍କ ସ୍ତ୍ରୀ ଓ ପୁଅଙ୍କୁ ମଙ୍ଗଳବାର ଗୋପାଳପୁର ବୁଲିବାକୁ ଆସି ସ୍ଥାନୀୟ ହୋଟେଲ୍ ଓସିଏନ ଇନ୍ ରେ ରହୁଥିଲେ। ବୁଧବାର ୧୧ଟା ବେଳେ ପ୍ରଦୀପ ତାଙ୍କ ସ୍ତ୍ରୀ ଚମ୍ପା ଓ ୫ ବର୍ଷର ପୁଅ ପରୀକ୍ଷିତକୁ ସାଙ୍ଗରେ ନେଇ ହୋଟେଲ ସି ସାଇଡ ବ୍ରିଜ ସମ୍ମୁଖ ସମୁଦ୍ର କୂଳରେ ଗାଧୋଉଥିଲେ। ପ୍ରଦୀପ ଜଣେ ବିକଳାଙ୍ଗ ହୋଇଥିବାରୁ ସେ କୂଳରେ ରହି ସ୍ନାନ ର ମଜ୍ଜା ନେଉଥିଲେ। ଦିନ ପ୍ରାୟ ସାଢେ ୧୧ଟା ବେଳେ ଅଚାନକ ଏକ ବଡ଼ ଲହରୀ ମାଡ଼ରେ ଚମ୍ପା ଓ ତାଙ୍କ ପୁଅ ପରୀକ୍ଷିତ ସମୁଦ୍ର ମଧ୍ୟକୁ ଟାଣି ହୋଇ ଯାଇଥିଲେ। ଏହା ଦେଖି ପ୍ରଦୀପ ଜୋରରେ ପାଟି କରିବାରୁ କୂଳରେ ବୁଲୁଥିବା ବ୍ରହ୍ମପୁର ଅଞ୍ଚଳର ଜୈନିକ ଛାତ୍ର ଜୋନ ମଣ୍ଡଳ ଓ ବେଳାଭୂମିରେ ଝାଲମୁଡି ବିକ୍ରି କରୁଥିବା ଭି ବୈରାଗୀ ସମୁଦ୍ରକୁ ଲମ୍ଫ ମାରି ସେମାନଙ୍କୁ ବଞ୍ଚାଇବା ପାଇଁ ଚେଷ୍ଟା କରିଥିଲେ। ଏଥିସହ ବେଳାଭୂମି ସୁରକ୍ଷାରେ ନିୟୋଜିତ ରହିଥିବା ଦୁଇ ଲାଇଫ ଗାର୍ଡ ବି ଚିଟିବାବୁ ଓ ଦେବେନ୍ଦ୍ର ପାଢ଼ୀ ତାଙ୍କ ନିକଟରେ ଥିବା ସୁରକ୍ଷା ସାମଗ୍ରୀ ନେଇ ପ୍ରାୟ ୧୫ ମିନଟ କାଳ ସଂଘର୍ଷ କରି ମା ଓ ପୁଅକୁ ଜୀବିତ ଉଦ୍ଧାର କରିଥିଲେ। ଏମାନଙ୍କୁ ଦୁଇ ଲାଇଫ ଗାର୍ଡ ପ୍ରାଥମିକ ଚିକିତ୍ସା ପୂର୍ବକ ପେଟରୁ ପାଣି ବାହାର କରିବା ପରେ ଚିକିତ୍ସା ନିମନ୍ତେ ଗୋପାଳପୁର ମେଡିକାଲ ପଠାଇଥିଲେ। ବର୍ତ୍ତମାନ ଉଭୟଙ୍କ ସ୍ବାସ୍ଥ୍ୟ ଅବସ୍ଥା ସୁସ୍ଥ ଥିବା ଜଣାପଡିଛି।
Comments are closed.