କପଡା, ଔଷଧ ଏବଂ ଅଟୋ ପାର୍ଟସ୍‍, ଜାଣନ୍ତୁ ଟ୍ରମ୍ପଙ୍କ ୨୫% ଶୁଳ୍କ ଭାରତକୁ କିପରି ପ୍ରଭାବିତ କରିବ?

ସମାଜ ଡିଜିଟାଲ ଡେସ୍କ: ବନ୍ଧୁତା ଭୁଲିଗଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଭାରତ ଉପରେ ୨୫ପ୍ରତିଶତ ଟାରିଫ୍‍ ଲଗାଇଲେ ଟ୍ରମ୍ପ । ଅଗଷ୍ଟ ୧ରୁ ଏହି ଟାରିଫ୍‍ ଲାଗୁ ହେବ ବୋଲି ଘୋଷଣା କରିଛନ୍ତି ଡୋନାଲ୍ଡ ଟ୍ରମ୍ପ । ଏହାସହିତ ଖୋଲାଖୋଲି ଧମକ ଦେଇ ଟ୍ରମ୍ପ କହିଛନ୍ତି ରୁଷଠାରୁ ଇନ୍ଧନ ଓ ଯୁଦ୍ଧାସ୍ତ୍ର କିଣିଲେ ଅଧିକ ଶୁଳ୍କ ଦେବାକୁ ପଡିବ । ଟ୍ରମ୍ପ ଭାରତ ଉପରେ ୨୫ପ୍ରତିଶତ ଶୁଳ୍କ ଘୋଷଣା କରିବା ପରଠାରୁ ଏଠାକାର ରପ୍ତାନିକାରୀଙ୍କ ଟେନସନ ବଢିଯାଇଛି । ତେବେ ଆମେରିକାର ଏହି ନୂତନ ନିର୍ଦ୍ଦେଶନାମା ଭାରତ ଉପରେ କ’ଣ ପ୍ରଭାବ ପକାଇବ ଜାଣିବା ।

ବୈଦେଶିକ ବାଣିଜ୍ୟ ନୀତି ବିଶେଷଜ୍ଞଙ୍କ ମତରେ ଟ୍ରମ୍ପଙ୍କ ନୂତନ ଶୁଳ୍କ ଭାରତର ରପ୍ତାନି ବାଣିଜ୍ୟ ଉପରେ ଏକ ବଢ ପ୍ରଭାବ ପକାଇବ । ଏହା ଭାରତୀୟ ଉତ୍ପାଦନ ଶିଳ୍ପକୁ ଏକ ବଡ କ୍ଷତି ପହଞ୍ଚାଇବ । ଆମେରିକାର ଏହି ଶୁଳ୍କ ବିଶେଷ କରି ବୟନଶିଳ୍ପ, ଅଟୋ ପାର୍ଟସ୍‍ ଏବଂ ଔଷଧ ଶିଳ୍ପକୁ ପ୍ରଭାବିତ କରିବ ବୋଲି କୁହାଯାଉଛି । ଟ୍ରମ୍ପଙ୍କ ଘୋଷଣା ପରେ ବିରୋଧୀ ଦଳ ଭାରତ ସରକାରଙ୍କୁ ଘେରିଛନ୍ତି । ଫଳରେ ସରକାର ଆମେରିକା ସହିତ ଏସମ୍ପର୍କରେ ଆଲୋଚନା କରିବାକୁ ଯୋଗାଯୋଗ କରିଥିବା ବେଳେ ବିଭିନ୍ନ ବିଶେଷଜ୍ଞମାନେ ମଧ୍ୟ ଆମେରିକାୀୟ ସରକାରୀ ଅଧିକାରୀଙ୍କ ସହିତ ଯୋଗାଯୋଗରେ ଅଛନ୍ତି ।

ଆମେରିକୀୟ ଗଣମାଧ୍ୟମ ସୂଚନା ଅନୁଯାୟୀ ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଭାରତ ଉପରେ ୨୫ପ୍ରତିଶତ ଶୁଳ୍କ ଲାଗୁ କରାଯିବା ଦ୍ୱାରା ଭାରତର ଅର୍ଥନୈତିକ ଏବଂ କୂଟନୈତିକ ଉଭୟ କ୍ଷେତ୍ରରେ ଗଭୀର ପ୍ରଭାବ ପଡିବ । ଏକ ରିପୋର୍ଟ ଅନୁଯାୟୀ, ଭାରତ ଆମେରିକାକୁ ପ୍ରାୟ ୭.୨୯ଲକ୍ଷ କୋଟି ଟଙ୍କାର ସାମଗ୍ରୀ ରପ୍ତାନି କରେ । ଅଗଷ୍ଟ ୧ରୁ ନୂତନ ନିୟମ ଲାଗୁ ହେବା ସହିତ ଏହି ସାମଗ୍ରୀର ମୂଲ୍ୟ ବୃଦ୍ଧି ପାଇବ । ଏହା ବ୍ୟତୀତ, ରାଜନୈତିକ ମହଲରେ ଏକ ଆଲୋଚନା ମଧ୍ୟ ଚାଲିଛି ଯେ ଆମେରିକାର ଏହି ନୂତନ ନିର୍ଦେଶ ଭାରତ ଏବଂ ରୁଷ ମଧ୍ୟରେ ବର୍ଷ ବର୍ଷର ପୁରୁଣା ସମ୍ପର୍କକୁ ପ୍ରଭାବିତ କରିବ । ପ୍ରକୃତରେ ଆମେରିକା ଭାରତ ଦ୍ୱାରା ରୁଷଠାରୁ ତେଲ ଏବଂ ଅସ୍ତ୍ରଶସ୍ତ୍ର କ୍ରୟକୁ ଶୁଳ୍କ ପାଇଁ ମୁଖ୍ୟ କାରଣ ଭାବରେ ଉଲ୍ଲେଖ କରିଛି ।

ଭାରତୀୟ ବ୍ୟବସାୟୀଙ୍କ କହିବା ଅନୁଯାୟୀ, ଆମେରିକାକୁ ରପ୍ତାନି ହେଉଥିବା ସାମଗ୍ରୀରେ କପଡା ଏବଂ ଔଷଧ ବ୍ୟତୀତ ରତ୍ନ, ଅଳଙ୍କାର ଏବଂ ଇଲେକ୍ଟ୍ରୋନିକ୍ସ ସାମଗ୍ରୀ ମଧ୍ୟ ଅନ୍ତର୍ଭୁକ୍ତ । ଏପରି ପରିସ୍ଥିତିରେ ଯଦି ମୂଲ୍ୟ ବୃଦ୍ଧି ପାଏ ତେବେ ସେମାନଙ୍କର ସମସ୍ୟା ବଢିବ । ଯଦି ଆମେ ସଂଖ୍ୟା ଉପରେ ନଜର ପକାଇବା ତେବେ ଭାରତ ୧.୦୦୫୬ଲକ୍ଷ କୋଟି ଟଙ୍କାର ଔଷଧ, ୫୮୬୬ଲକ୍ଷ କୋଟି ଟଙ୍କାର ଅଟୋ ପାର୍ଟସ୍‍, ୭୫୪୨ଲକ୍ଷ କୋଟି ଟଙ୍କାର ରତ୍ନ ଏବଂ ଅଳଙ୍କାର ଏବଂ ସାମୁଦ୍ରିକ ଖାଦ୍ୟ ରପ୍ତାନି କରିଥାଏ ।