ବ୍ରହ୍ମପୁର: ବ୍ରହ୍ମପୁର ମହାନଗର ନିଗମ(ବିଏମ୍ସି) ତରଫରୁ ସହରରେ ଘର ଟିକସ ବୃଦ୍ଧି କରାଯାଇଛି। ଏହାକୁ ନେଇ ଅସନ୍ତୋଷ ଦେଖାଦେଇଛି। ବର୍ଦ୍ଧିତ ଘର ଟିକସ ପ୍ରସଙ୍ଗରେ ବୁଧବାର ବିଏମ୍ସି କମିଶନର୍ ଡ.ସିଦ୍ଧେଶ୍ବର ବଳିରାମ ବୋନ୍ଦରଙ୍କୁ ସାକ୍ଷାତ କରିଛନ୍ତି ସିପିଆଇ(ଏମ୍)ର କର୍ମକର୍ତାମାନେ। ତୁରନ୍ତ ବର୍ଦ୍ଧିତ ଘର ଟିକସ ପ୍ରତ୍ୟାହାର ନ ହେଲେ ଆଗାମୀ ଦିନରେ ବଡ଼ ଧରଣର ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି। ଦଳ ତରଫରୁ କୁହାଯାଇଥିଲା ଯେ, କରୋନା ଯୋଗୁ ଲୋକମାନଙ୍କ ଜୀବନ ଓ ଜୀବିକା ସାଂଘାତିକ ଭାବେ କ୍ଷତିଗ୍ରସ୍ତ ହୋଇଛି। ସରକାରୀ ସହାୟତାର ଆବଶ୍ୟକତା ଅଛି। ଲୋକମାନେ ଆର୍ଥୀକ ମାନ୍ଦାବସ୍ଥା ଦେଇ ଗତି କରୁଥିବା ବେଳେ ବର୍ଦ୍ଧିତ ଘର ଟିକସ ସେମାନଙ୍କୁ ଆହୁରି ଭାରାକ୍ରାନ୍ତ କରିବ। ସାଧାରଣଙ୍କ ଲୋକଙ୍କ ଠାରୁ ଆଦାୟ ହେଉଥିବା ଫିସ୍, ଟିକସ ଏବଂ ଭଡ଼ା ସଂଗ୍ରହ ଛାଡ଼ କରିବା ପାଇଁ ସରକାର ଘୋଷଣା କରିଥିଲେ। ଏଭଳି ସ୍ଥଳେ ଘର ଟିକସ ବଢ଼ାଇବା ଏକ ଜନବିରୋଧୀ ନିଷ୍ପତ୍ତି ବୋଲି ଦଳର କର୍ମକର୍ତାମାନେ କହିଥିଲେ। ସିପିଆଇ(ଏମ୍) ବ୍ରହ୍ମପୁର ସଂପାଦକ ଯୁଧିଷ୍ଠିର ବେହେରାଙ୍କ ନେତୃତ୍ବରେ ବହୁ କର୍ମୀ ଆଲୋଚନା ବେଳେ ଉପସ୍ଥିତ ଥିଲେ। ତେବେ ଯଦି ଘର ଟିକସ ସଂପର୍କରେ ଯଦି କୌଣସି ଅଭିଯୋଗ ଥାଏ, ତେବେ ସୀଧା ମୋ ସହିତ ଆଲୋଚନା କରନ୍ତୁ ବୋଲି କମିଶନର୍ ବୋନ୍ଦର ପ୍ରକାଶ କରିଥିଲେ। ସହରର ଉନ୍ନୟନ କାର୍ୟ୍ୟ ପାଇଁ ପାଣ୍ଠିର ଆବଶ୍ୟକତା ରହିଛି । କୌଣସି ପ୍ରକାରରେ ମଧ୍ୟ ଟିକସ ହ୍ରାସ କରାଯିବ ନାହିଁ ବୋଲି ସେ କହିଥିଲେ।
Comments are closed.