ବରଗଡ଼ : ବରଗଡ଼ ଜିଲା ଭେଡ଼େନ ବ୍ଲକ ଅନ୍ତର୍ଗତ ଅମଲିପାଲି ଗାଁରେ ଝାଡ଼ାବାନ୍ତି ଆତଙ୍କ। ଝାଡ଼ାବାନ୍ତିରେ ଗୋଟିଏ ପରିବାରର ସ୍ବାମୀ, ସ୍ତ୍ରୀଙ୍କ ମୃତ୍ୟୁ ହୋଇଥିବାବେଳେ ପରିବାରର ଆଉ ୪ ଜଣ ଆକ୍ରାନ୍ତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଏହି ଗ୍ରାମର ଆହୁରି ୩୫ ଜଣ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି। ଗ୍ରାମର ଜଗନ୍ନାଥ ଦେହୁରୀ ଙ୍କ ଝାଡ଼ାବାନ୍ତିରେ ୧୦ ତାରିଖରେ ମୃତ୍ୟୁ ହୋଇଯାଇଥିଲା। ସ୍ବାମୀଙ୍କ ମୃତ୍ୟୁର ୬ ଦିନ ପରେ ଶୁକ୍ରବାର ସକାଳେ ସ୍ତ୍ରୀ କଳାବତୀଙ୍କ ମଧ୍ୟ ଝାଡ଼ାବାନ୍ତିରେ ମୃତ୍ୟୁ ହୋଇଛି। କଳାବତୀଙ୍କ ଝିଅ ମମତା ଓ ପୁଅ କୁଶ ମଧ୍ୟ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି। ଏହି ଗାଁର ୩୫ ଜଣରୁ ଅଧିକ ବ୍ୟକ୍ତି ଗତ ୧୨ ତାରିଖରୁ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି। ବରଗଡ଼ ଓ ଭେଡ଼େନ ସରକାରୀ ଡାକ୍ତରଖାନାର ଡାକ୍ତରୀ ଦଳ ଅମଲିପାଲିରେ ରହି ଆକ୍ରାନ୍ତଙ୍କ ଚିକିତ୍ସା କରୁଛନ୍ତି। ଘରକୁ ଘର ଯାଇ ଔଷଧ ବଣ୍ଟାଯାଉଛି। ରୋଗାକ୍ରାନ୍ତଙ୍କଠାରୁ ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି। ଅତାବିରା ବିଧାୟକ ନିହାର ରଞ୍ଜନ ମହାନନ୍ଦ ଶୁକ୍ରବାର ଅମଲିପାଲି ଯାଇ ମୃତ ଦମ୍ପତିଙ୍କ ପରିବାର ସଦସ୍ୟଙ୍କୁ ସମବେଦନା ଜଣାଇଥିଲେ। ସେ ଗାଁର ପରିମଳ ଅବସ୍ଥାରେ ଉନ୍ନତି ଓ ପାନୀୟ ଜଳ ବିଶୋଧନ ସମ୍ପର୍କରେ ବିଭାଗୀୟ ଅଧିକାରୀଙ୍କ ସହିତ ଆଲୋଚନା କରିଛନ୍ତି।
Comments are closed.