ଧାମନଗର: ୬ ବର୍ଷର ପ୍ରେମ ପରେ ବାହା ହେଲା ପ୍ରେମିକ । ୨ବର୍ଷର ବିବାହ ପରେ ଅଧାବାଟରେ ଛାଡ଼ିଦେଲା ସ୍ୱାମୀ । ସ୍ତ୍ରୀର ମାନ୍ୟତା ଦାବିରେ ସ୍ବାମୀ ଦୁଆରେ ଧାରଣାରେ ବସିଲେ ସ୍ତ୍ରୀ ସ୍ମୃତି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ତିହିଡି ଥାନା ଭାଟପଡା ପଞ୍ଚାୟତ ଅଧିନ ଶଙ୍ଖିଡା ଗାଁରେ । ସେହି ଗାଁର ପଞ୍ଚାନନ ରଥଙ୍କ ପୁଅ ପ୍ରଭାସ ରଥଙ୍କୁ ଧୁଷୁରୀ ଥାନା ଖଡିମାହାରା ଗାଁର ଧନେଶ୍ୱର ଦାସଙ୍କ ଝିଅ ସ୍ମୃତି ଦାସ ବିବାହ କରିଥିଲେ । ଉଭୟଙ୍କ ମଧ୍ୟରେ ୨୦୧୬ ମସିହାରେ ପ୍ରେମ ସମ୍ପର୍କ ଗଢି ଉଠିଥିଲା । ସ୍ମୃତି ଦଳିତ ବର୍ଗର ଓ ପ୍ରଭାସ ବ୍ରାହ୍ମଣ ଜାତିରେ ହୋଇଥିବା ନେଇ ବିବାଦ ଉପୁଜି ଥିଲା ।
ଗତ ୨୦୧୯ ମସିହାରେ ସ୍ମୃତିକୁ ନେଇ ପ୍ରଭାସ ଭୁବନେଶ୍ବର ଚାଲିଯାଇଥିଲେ । ପରେ ୨୦୨୦ ମସିହା ନଭେମ୍ବର ମାସରେ ଭଦ୍ରକ ଆସି ନୋଟାରୀ ବିବାହ ସହିତ ଲୋକନାଥ ମନ୍ଦିରରେ ଉଭୟ ପରିବାରଙ୍କ ଉପସ୍ଥିତିରେ ବୈଦିକ ରୀତି ଅନୁଯାୟୀ ଉଭୟଙ୍କ ବିବାହ ହୋଇଥିଲା । ବିବାହ ପରେ ସ୍ମୃତିକୁ ନେଇ ହାଇଦ୍ରାବାଦ ପଳେଇ ଯାଇଥିଲେ ପ୍ରଭାସ । ସେଠାରେ ପ୍ରଭାସ କାମଧନ୍ଦା କରି ଉଭୟ ଖୁସିରେ ରହୁଥିଲେ । ୨୦୨୧ ମସିହା ବୈଶାଖ ମାସରେ ଉଭୟ ଖଡିମାହାରା ଆସି କିଛିଦିନ ରହି ପୁନଶ୍ଚ ହାଇଦ୍ରାବାଦ ଫେରି ଯାଇଥିଲେ । ମାତ୍ର କମ୍ପାନୀ ତାଙ୍କୁ ଦିଲ୍ଲୀକୁ ବଦଳି କରିଥିବା ଏବଂ ସେଠାରେ ଭଡା ଘର ଯୋଗାଡ କରିବା ପରେ ସେଠାକୁ ନେଇଯିବ ବୋଲି କହିବା ସହିତ ସେ ପର୍ଯ୍ୟନ୍ତ ଶଙ୍ଖିଡାରେ ରହିବା ଲାଗି ସ୍ମୃତିକୁ କହିଥିଲେ ପ୍ରଭାସ । ସ୍ମୃତି ନିଜ ବାପାଙ୍କ ସହିତ ଗତ ତା ୨୫-୦୪-୨୨ରିଖରେ ଶଙ୍ଖିଡା ଯାଇଥିଲେ ।
ମାତ୍ର ସ୍ମୃତିକୁ ପ୍ରଭାସଙ୍କ ପରିବାର ଲୋକେ ଅଜାତି କହି ଘରକୁ ପୁରାଇ ଦେଇ ନଥିଲେ । ୩ ଲକ୍ଷ ଟଙ୍କା ଆଣ ପୁରୀ ମୁକ୍ତିମଣ୍ଡପରେ ଜାତି କରାଇ ଗୋତ୍ରରେ ପୁରାଇ ଦେବୁ କହିଥିଲେ । ଘଟଣା ସମ୍ପର୍କରେ ସ୍ମୃତି ପ୍ରଭାସକୁ ଜଣାଇଥିଲେ । ହେଲେ ପରିବାର ଲୋକଙ୍କ ମତାମତକୁ ସମର୍ଥନ କରିଥିଲେ ପ୍ରଭାସ । ପରବର୍ତ୍ତୀ ସମୟରେ ଆଉ ଫୋନ ଉଠେଇ ନଥିଲେ । ଯାହାକୁ ନେଇ ତିହିଡି ଥାନାରେ ଦ୍ୱାରସ୍ଥ ହୋଇଥିଲା ସ୍ମୃତି । ମାତ୍ର ପୁଲିସ ମାମଲା ବି ରୁଜୁ କରିନଥିଲା । ନିରୁପାୟ ହୋଇ ଅଦାଲତରେ ଆଶ୍ରୟ ନେଇଥିଲା ସ୍ମୃତି ।
ଅଦାଲତଙ୍କ ନିର୍ଦ୍ଦେଶ କ୍ରମେ ତିହିଡି ପୁଲିସ ଗତ ତା ୧୪-୦୭-୨୨ ରିଖରେ ପ୍ରଭାସ ଓ ତାଙ୍କ ପରିବାର ଲୋକଙ୍କ ବିରୋଧରେ ସଂଗୀନ ଦଫାରେ ଏକ ମାମଲା ରୁଜୁ କରିଛି । ହେଲେ ଏଯାବତ କୌଣସି ପଦକ୍ଷେପ ଗ୍ରହଣ କରାଯାଇ ନଥିବାରୁ ଅସନ୍ତୋଷ ପ୍ରକାଶ ପାଇଛି । ଇତିମଧ୍ୟରେ ପ୍ରଭାସ ଅନ୍ୟତ୍ର ବିବାହ କରିବ ଏବଂ ତାଙ୍କ ପରିବାର ସମ୍ପୂର୍ଣ୍ଣ ସହଯୋଗ କରୁଥିବା ସ୍ମୃତି ଜାଣିବାକୁ ପାଇଛି । ଯାହାକୁ ନେଇ ଆଜି ନିଜ ଭାଇ ଓ ବନ୍ଧୁ ବର୍ଗଙ୍କ ସହିତ ସ୍ମୃତି ନିଜ ସ୍ବାମୀଙ୍କ ଦୁଆରେ ଧାରଣାରେ ବସିଛନ୍ତି । ସ୍ତ୍ରୀର ମାନ୍ୟତା ନମିଳିବା ପର୍ଯ୍ୟନ୍ତ ଧାରଣା ଜାରି ରଖିବେ ସ୍ମୃତି ଚେତାବନୀ ଦେଇଛନ୍ତି ।
Comments are closed.