ଛାତିଥରା ଦୃଶ୍ୟ ; ବିରିୟାନି ପାଇଁ ନାବାଳକକୁ ୬୦ ଥର ଛୁରାମାଡ

ନୂଆଦିଲ୍ଲୀ : ରାଜଧାନୀ ଦିଲ୍ଲୀରେ ଏକ ଚାଞ୍ଚଲ୍ୟକର ଘଟଣା ହଇଚଇ ସୃଷ୍ଟି କରିଛି। ବିରିୟାନି ପାଇଁ ଟଙ୍କା ମାଗି ଜଣେ ୧୬ ବର୍ଷୀୟ ନାବାଳକ ଆଉ ଜଣେ ୧୭ ବର୍ଷୀୟ ନାବାଳକଙ୍କୁ ୬୦ ଥର ଛୁରି ଭୁସି ହତ୍ୟା କରିଥିବା ଜଣାପଡିଛି।
ଦିଲ୍ଲୀର ‘ୱେଲ୍‌‌କମ୍‌‌’ ଅଞ୍ଚଳରେ ଘଟିଥିବା ଏହି ଛାତିଥରା ଦୃଶ୍ୟ ସେଠାରେ ଥିବା ସିସିଟିଭରେ କଏଦ ହୋଇଛି। ସିସିଟିଭିରେ କଏଦ ହୋଇଥିବା ଦୃଶ୍ୟ ଅନୁଯାୟୀ, ନାବାଳକ ଜଣଙ୍କ ଅନ୍ୟ ଜଣେ ନାବାଳକଙ୍କୁ ବିରିୟାନି ପାଇଁ ଟଙ୍କା ମାଗିବା ପରେ ଉଭୟଙ୍କ ପରେ ହାତାହାତି ହୋଇଥିଲା। ଏହାପରେ ସେ ଉକ୍ତ ନାବାଳକର ଗଳା କାଟିବାକୁ ଉଦ୍ୟମ କରିଥିଲା। ପରେ ବାରମ୍ବାର ୬୦ ଥର ଛୁରି ଭୁସିବା ପରେ ରକ୍ତାକ୍ତ ମୃତଦେହକୁ ଘୋଷାରି କିଛି ବାଟ ନେବା ପରେ ସେ ନାଚୁଛି। ଏହି ଘଟଣା ପରେ ପୁଲିସ ସିସିଟିଭ ଫୁଟେଜ ଆଧାରରେ ବୁଧବାର ସକାଳେ ନାବାଳକକୁ ଗିରଫ କରି ତଦନ୍ତ ଆରମ୍ଭ କରିଛି।
ସୂଚନା ଯୋଗ୍ୟ, ସ୍କୁଲରୁ ପାଠ ସାରି ଉକ୍ତ ନାବାଳକ ମଙ୍ଗଳବାର ରାତିରେ ଟଙ୍କା ମାଗି ଛୁରି ଭୁସି ହତ୍ୟା କରିଛି। ସେହି ସମୟରେ ସେ ନିଶାସକ୍ତ ଅବସ୍ଥାରେ ଥିଲା ବୋଲି ମଧ୍ୟ ପୁଲିସ ଠାରୁ ସୂଚନା ମିଳିଛି। ଦିନ ମଜୁରିଆ ଭାବେ ଏହି ନାବାଳକର ବାପା ମାଆ କାମ କରନ୍ତି। ଦୁଇ ନାବାଳକ ପରସ୍ପରକୁ ଜାଣନ୍ତି ନାହିଁ। ମାତ୍ର ଅଭିଯୁକ୍ତ ବିରିୟାନି କିଣିବାକୁ ୩୫୦ ଟଙ୍କା ମାଗିବା ପରେ ଉଭୟଙ୍କ ମଧ୍ୟରେ ଝଗଡା ହେବା ପରେ ଏଭଳି ଅଭାବନୀୟ ଘଟଣା ଘଟିଛି। ଏହି ଘଟଣାର ପରେ ଗୁରୁତର ଅବସ୍ଥାରେ ନାବାଳକଙ୍କୁ ସ୍ଥାନୀୟ ଲୋକେ ହସ୍ପିଟାଲ ନେଇଥିଲେ। ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।