ପିପିଲି : ପିପିଲି ନିକଟବର୍ତ୍ତୀ ନୂଆଶାସନ ଗ୍ରାମରୁ ବୁଧବାର ପୂର୍ବାହ୍ନରେ ଏକ ଚିତ୍ରା ହରିଣକୁ ବାଳକାଟି ବନବିଭାଗ ଉଦ୍ଧାର କରିଛି। ହରିଣଟି ଖାଦ୍ୟ ଅନ୍ୱେଷଣରେ କୋଣାର୍କ ବାଲୁଖଣ୍ଡ ଅଭୟାରଣ୍ୟରୁ ଚାଲି ଆସିଥିବା ଅନୁମାନ କରାଯାଉଛି ।
ସୂଚନା ଅନୁଯାୟୀ, ନୂଆଶାସନ ଗ୍ରାମ ନିକଟସ୍ଥ ଭାର୍ଗବୀ ନଦୀବନ୍ଧରେ ବୁଧବାର ସକାଳେ ଏକ ଚିତ୍ରା ହରିଣ ବୁଲୁଥିବା ବେଳେ ତାକୁ କେତୋଟି ବୁଲା କୁକୁର ଗୋଡାଇଥିଲେ ବିକଳରେ ହରିଣଟି ଉତ୍ତରସାହିର ନାଲୁଆ ପଣ୍ଡାଙ୍କ ଗୁହାଳ ଘର ମଧ୍ୟରେ ପଶି ଯାଇଥିଲା । ପରେ ଗ୍ରାମର ଯୁବକମାନେ ହରିଣଟିକୁ ସେଠାରୁ ସୁରକ୍ଷିତ ଭାବେ ଉଦ୍ଧାର କରି ଏକ ଘର ମଧ୍ୟରେ ରଖିବା ସହ ବନବିଭାଗକୁ ଖବର ଦେଇଥିଲେ । ବାଳକାଟି ରେଞ୍ଜର ଜୟକୃଷ୍ଣ ଯଦୁମଣୀ ଦାସଙ୍କ ନିର୍ଦ୍ଦେଶ କ୍ରମେ ଫରେଷ୍ଟର ପ୍ରଭାକର ଦଳେଇ, ଫରେଷ୍ଟ ଗାର୍ଡ ବିଶ୍ୱନାରାୟଣ ମିଶ୍ର ପ୍ରମୁଖ ସେଠାରେ ପହଞ୍ଚି ହରିଣକୁ ନେଇଥିଲେ। ହରିଣଟିକୁ ଭୁବନେଶ୍ୱର ଭରତପୁର ସ୍ଥିତ ୱାଇଲ୍ଡ ଲାଇଫକୁ ନିଆଯାଇ ସେଠାରେ ଛଡାଯିବ ବୋଲି ଫରେଷ୍ଟର ଶ୍ରୀଦଳାଇ ସୂଚନା ଦେଇଛନ୍ତି । ହରିଣଟିକୁ ସୁରକ୍ଷିତ ଭାବେ ଉଦ୍ଧାର କରାଯିବା ଦିଗରେ ସହଯୋଗ ପାଇଁ ବନବିଭାଗ ପକ୍ଷରୁ ନୂଆଶାସନ ଉତ୍ତରସାହି ବାସିନ୍ଦାଙ୍କୁ ସାଧୁବାଦ ଦିଆଯାଇଛି ।
