ଭୁବନେଶ୍ବର: କରୋନା ଭୟକୁ ବଳି ପଡ଼ିଛି ପେଟର ଭୋକ । ଜୀଇ ରହିବାର ଇଚ୍ଛା ମଣିଷକୁ ମାରି ଦେଉଛି । କାମ ଧନ୍ଦା ପାଇଁ ବାହାର ରାଜ୍ୟକୁ ଯାଇଥିବା ପ୍ରବାସୀ କରୋନାଠାରୁ ବେଶୀ ଡ଼ରୁଛି ଭୋକକୁ । ଯେଉଁଥିପାଇଁ ସେ ଘରମୁହାଁ; କିନ୍ତୁ ସତରେ କ’ଣ ସମସ୍ତେ ଘରେ ପହଞ୍ଚି ପାରୁଛନ୍ତି ?
ଘରମୁହାଁ ଶ୍ରମିକଙ୍କ ଉପରେ କେର୍ଉଠି ଟ୍ରକ୍ ମାଡ଼ି ଗଲାଣି ତ କେଉଁଠି ଟ୍ରେନ୍ ତଳେ ଜୀବନ ଗଲାଣି । କେଉଁଠି ପୁଣି ବସ୍ ଓଲଟୁଛି । ମାତ୍ର ଘରକୁ ଚାଲିଚାଲି ଆସୁଥିବାବେଳେ ରାସ୍ତାରେ ଝୁଣ୍ଟିପଡ଼ି ଜଣେ ବ୍ୟକ୍ତି ମୃତ୍ୟୁବରଣ କରିବା ଘଟଣା ବିରଳ । ଏପରି ଘଟଣା ଘଟିଛି ଜଳେଶ୍ବର ନିକଟରେ । ମୃତକଙ୍କ ଘର ପୁରୀ ଜିଲା କାକଟପୁର ଅଞ୍ଚଳରେ ବୋଲି ଜଣାପଡ଼ିଛି ।
ସୂଚନା ଅନୁସାରେ କାକଟପୁର ନିକଟବର୍ତୀ ଟିକରପଡ଼ାର ଏହି ବ୍ୟକ୍ତି କଲକତାରେ କାମ କରୁଥିଲେ । ଲକ୍ଡ଼ାଉନ ଯୋଗୁଁ ଗାଡ଼ି ଚଳାଚଳ ବନ୍ଦ ହୋଇ ଯାଇଥିଲା । ତେଣୁ ସେ ବାଧ୍ୟ ହୋଇ ଚାଲିଚାଲି ଗାଁକୁ ଫେରୁଥିଲେ । ମାତ୍ର ଜଳେଶ୍ବର ନିକଟରେ ରାସ୍ତାରେ ହଠାତ୍ ସେ ଝୁଣ୍ଟି ପଡ଼ିଥିଲେ ଓ ଚେତା ହରାଇଥିଲେ । କିଛି ଲୋକ ତାଙ୍କୁ ସ୍ଥାନୀୟ ଡ଼ାକ୍ତରଖାନାରେ ଭର୍ତି କରିଥିଲେ ମଧ୍ୟ ସେଠାରେ ତାଙ୍କର ମୃତ୍ୟୁ ଘଟିଥିବା ସୂଚନା ମିଳିଛି ।
ଅନ୍ୟପକ୍ଷରେ ଦିନକ ତଳେ ଜଣେ ବ୍ୟକ୍ତି ଘରକୁ ଫେରିବାକୁ ନିଜର ଗୋଟିଏ ବଳଦ ବିକ୍ରି କରି ନିଜେ ଗାଡ଼ିକୁ ଟାଣିଟାଣି ନେଉଥିବା ଦୃଶ୍ୟ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା । ସେହିପରି କିଛି ପ୍ରବାସୀ ଶ୍ରମିକ ପଞ୍ଜାବରୁ ଝାନ୍ସି ଯାଉଥିବା ରାସ୍ତାରେ ଆଉ ଏକ ଅଦ୍ଭୁତ ଦୃଶ୍ୟ ଦେଖିବାକୁ ମିଳିଥିଲା । ଅରବିନ୍ଦ ଚୌହ୍ବାନ ନାମକ ଜଣେ ବ୍ୟକ୍ତି ତାହାକୁ ନିଜ ଟ୍ବିଟର ହ୍ୟାଣ୍ଡଲରେ ପୋଷ୍ଟିଂ କରିଥିଲେ । ଗୋଟିଏ ଚକଲଗା ବ୍ୟାଗ ଉପରେ ଗୋଟିଏ ଛୁଆକୁ ଶୁଆଇ ମା’ ଟାଣିଟାଣି ନେଉଥିବା ଦୃଶ୍ୟ ଦେଖିବାକୁ ମିଳିଥିଲା ।
Video of the sleeping kid on trolly bag pic.twitter.com/t77AXiZG3u
— Arvind Chauhan (@arvindcTOI) May 14, 2020
ସେହିପରି ନବରଙ୍ଗପୁର ଅଞ୍ଚଳର କିଛି ଶ୍ରମିକ ତେଲେଙ୍ଗାନାରୁ ସାଇକେଲରେ ଓ କିଛି ମୁମ୍ବାଇରୁ ସାଇକେଲରେ ୨୦୦୦ କିଲୋମିଟର ରାସ୍ତା ଅତିକ୍ରମ କରି ଓଡ଼ିଶାରେ ପହଞ୍ଚିବା ଘଟଣା ଦେଖିବାକୁ ମିଳିଛି । ଆଉ ଏହାହିଁ କଟୁ ସତ୍ୟ ଯେ ଜନ୍ମ ଭୂଇଁର ମମତା କେହି କେବେ ଛାଡ଼ି ପାରେ ନାହିଁ ଆଉ ଭୟଠାରୁ ଭୋକ ବଡ଼ ତାହା ପ୍ରମାଣିତ ହୋଇଛି ।
