ହାଇଦ୍ରାବାଦ ..- ଆନ୍ଧ୍ର ପ୍ରଦେଶରେ ଜଣେ ପ୍ରବାସୀ ଭାରତୀୟଙ୍କୁ ହତ୍ୟା କରାଯାଇଛି । ଚିଗୁରପତି ଜୟରାମ ନାମକ ବ୍ୟକ୍ତିଙ୍କୁ ବିଜୟ ଓ୍ୱାଡାର ନନ୍ଦିଆଗାମ ନିକଟରେ ତାଙ୍କ କାରରୁ ମୃତ ଅବସ୍ଥାରେ ଉଦ୍ଧାର କରାଯାଇଛି । ଚିଗୁରପତି ଜୟରାମ ଆମେରିକାରେ ଫ୍ଲୋରିଡାରେ ବସବାସ କରନ୍ତି । ସେ ୪ କୋଟି ଚଙ୍କା ଋଣ ନେଇ ଏହାକୁ ପରିଶୋଧ କରୁ ନଥିବାରୁ ତାଙ୍କୁ ହତ୍ୟା କରାଯାଇଥିବା ପୁଲିସ ତଦନ୍ତ ସମୟରେ ଜାଣିବାକୁ ପାଇଛି ।
ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ତଥା ରିଅଲ୍ ଇଷ୍ଟେଟ୍ ବ୍ୟବସାୟୀ ରାକେଶ ରେଡ୍ଡୀ ଓ ତାଙ୍କ ଗାଡି ଚାଳକକୁ ପୁଲିସ ଗିରଫ କରିଛି । ଚିଗୁରପତି ଜୟରାମ , ରାକେଶଙ୍କ ଠାରୁ ୪ କୋଟି ଟଙ୍କା ଋଣ ନେଇଥିଲେ । ପରେ ସେ ଟଙ୍କା ପରିଶୋଧ କରି ନ ଥିଲେ ।
ଜୟରାମ ରାକେଶଙ୍କର ମୋବାଇଲ ନମ୍ବରକୁ ବ୍ଲକ କରି ଦେଇଥିଲେ । ପରେ ଅନ୍ୟ ଏକ ନମ୍ବରରୁ ତାଙ୍କ ସହ ଜଣେ ମହିଳାଙ୍କ ପରିଚୟ ଦେଇ ଚାଟ୍ କରିଥିଲେ । କିଛି ଦିନ ପରେ ସେ(ମିଛ ଚାଟିଂ କରୁଥିବା ମହିଳା) ଜୟରାମଙ୍କୁ ଏକୁଟିଆ ଦେଖା କରିବା ପାଇଁ କହିଥିଲେ । ଜୟରାମ ଏହି ଫାଶରେ ପଡିଯାଇଥିଲେ। ଏକୁଟିଆ ଦେଖା କରିବାକୁ ଯାଇଥିବା ବେଳେ ତାଙ୍କୁ ରାକେଶ ଓ ତାଙ୍କ ଡ୍ରାଇଭର ଧରି ନେଇ ନିସ୍ତୁକ ମାଡ ମାରିଥିଲେ । ୪ କୋଟିକୁ ସୁଧ ମୂଳ କରି ୬ କୋଟି ଟଙ୍କା ମାଗିଥିଲେ । ମାତ୍ର ଜୟରାମ ୬ ଲକ୍ଷ ଟଙ୍କା ଦେବେ ବୋଲି କହିଥିଲେ । ରାକେଶ ରାଗରେ ତାଙ୍କ ମୁଣ୍ଡକୁ ଏକ କାନ୍ଥରେ ପିଟି ଦେଇଥିଲେ । ଜୟରାମଙ୍କ ସେହିଠାରେ ମୃତ୍ୟୁ ହୋଇଥିଲା ।
ଏହାପରେ ଦୁଇ ଜଣ ଜୟରାମଙ୍କ କାର ନେଇ ବିଜୟଓ୍ୱାଡାରେ ଛାଡିଦେଇଥିଲେ । ସେଠାରେ ଏହାକୁ ଏକ ଦୁର୍ଘଟଣାର ରୂପ ଦେବାକୁ ଚେଷ୍ଟା କରିଥିଲେ । ମାତ୍ର ବିଭିନ୍ନ ଟୋଲ୍ ଗେଟ୍ର ସିସି ଟିଭି ଫୁଟେଜ୍କୁ ସଂଗ୍ରହ କରି ପୁଲିସ ଅଭିଯୁକ୍ତମାନଙ୍କୁ ଗିରଫ କରିବାରେ ସଫଳ ହୋଇଥିଲା ।
