ମୁମ୍ବଇ : ବଲିଉଡ଼ ଅଭିନେତା ଅଜୟ ଦେବଗନ୍ ଏବେ ତାଙ୍କ ଆଗାମୀ ଚଳଚ୍ଚିତ୍ର ଅର୍ଥାତ୍ ଆସନ୍ତା ୨୨ ଫେବୃଆରୀରେ ମୁକ୍ତିଲାଭ ହେବାକୁ ଥିବା ‘ଟୋଟାଲ ଧମାଲ’କୁ ନେଇ ଖୁବ୍ ଚର୍ଚ୍ଚାରେ ରହିଛନ୍ତି। ଅନ୍ୟପକ୍ଷରେ ତାଙ୍କ ଅଭିନୀତ ଅନ୍ୟ ଏକ ଚଳଚ୍ଚିତ୍ର ‘ଦେ ଦେ ପ୍ୟାର୍ ଦେ’ ମଧ୍ୟ ଚର୍ଚ୍ଚାର ପରିସରକୁ ଆସିଛି। ମିଳିଥିବା ଖବର ଅନୁସାରେ, ତାଙ୍କ ଅଭିନୀତ ‘ଦେ ଦେ ପ୍ୟାର୍ ଦେ’ ର ମୁକ୍ତିଲାଭ ତାରିଖ ବଦଳି ଯାଇଛି। ତେବେ ‘ଟୋଟାଲ ଧମାଲ’ ପାଇଁ ଏହାର ମୁକ୍ତିଲାଭ ତାରିଖ ପରିବର୍ତ୍ତନ କରାଯାଇଥିବା କୁହାଯାଉଛି। ପ୍ରଥମେ ଏହା ୧୫ ମାର୍ଚ୍ଚରେ ମୁକ୍ତିଲାଭ କରିବାର ଥିଲା। ମାତ୍ର ଏବେ ଏହାର ମୁକ୍ତିଲାଭ ତାରିଖରେ ପରିବର୍ତ୍ତନ କରାଯାଇ ୧୭ ମେ କରାଯାଇଛି।
ସୂଚନା ଅନୁସାରେ, ୨୦ ଦିନ ମଧ୍ୟରେ ଜଣେ ଅଭିନେତାଙ୍କ ୨ଟି ଚଳଚ୍ଚିତ୍ର ମୁକ୍ତିଲାଭ କରିବା ବ୍ୟବସାୟ ପାଇଁ ଭଲ ନୁହେଁ। ଦୁଇ ଚଳଚ୍ଚିତ୍ରର ମାର୍କେଟିଙ୍ଗ୍ କ୍ୟାମ୍ପେନିଙ୍ଗ୍ ରେ ପ୍ରଭାବ ପଡ଼ିପାରେ। ଏହି କାରଣରୁ ନିର୍ମାତା ଏହାର ମୁକ୍ତିଲାଭ ତାରିଖ ବଦଳାଇବା ପାଇଁ ନିଷ୍ପତ୍ତି ନେଇଥିବା ଜଣାପଡ଼ିଛି। ପ୍ରଯୋଜକ ଭୂଷଣ କୁମାରଙ୍କ କହିବା ଅନୁସାରେ, “ଦେ ଦେ ପ୍ୟାର୍ ଦେ’ ଚଳଚ୍ଚିତ୍ର ଏକ ବ୍ୟବସାୟ ଭିତ୍ତିକ ମନୋରଞ୍ଜନ ମାଧ୍ୟମ। ଏହା ପାଇଁ ଏକ ଭଲ ମୁକ୍ତିଲାଭ ତାରିଖ ରହିବା ଆବଶ୍ୟକ। ଟୋଟାଲ ଧମାଲ ମୁକ୍ତିିଲାଭ ହେବାର ୧୫-୨୦ ଦିନ ମଧ୍ୟରେ ଆମ ଚଳଚ୍ଚିତ୍ର ମୁକ୍ତିଲାଭ କରିବାକୁ ଆମେ ଠିକ୍ ମନେକରୁନାହୁଁ। ତେଣୁ ୧୭ ମେ ଉଚିତ୍ ତାରିଖ”।
ଉଲ୍ଲେଖଯୋଗ୍ୟ, ‘ଦେ ଦେ ପ୍ୟାର୍ ଦେ’ ଚଳଚ୍ଚିତ୍ରରେ ଅଜୟଙ୍କ ବ୍ୟତୀତ ରକୁଲ ପ୍ରୀତ୍ଙ୍କୁ ମଧ୍ୟ ମହତ୍ତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିବ। ଚଳଚ୍ଚିତ୍ରର ପ୍ରଯୋଜନା ଭାର ଲଭ୍ ରଞ୍ଜନ ଓ ଭୂଷଣକୁମାର ବହନ କରିଛନ୍ତି।
