ସମାଜ ଡିଜିଟାଲ ଡେସ୍କ: ଶିଶୁପୁତ୍ରକୁ ମାରି ପୋତିଦେଲେ ନିଜ ମାଆ ଓ ବାପା। ଏଭଳି ଅଭାବନୀୟ ଘଟଣା ଘଟିଛି ଚୌଦ୍ବାର ଥାନା ଅନ୍ତର୍ଗତ ବ୍ୟାଘ୍ର ବାହିନୀ ଆଦିବାସୀ ସାହିରେ। ସୋମବାର ରାତିରେ ବାପା ରାଜୁ ହେମ୍ବ୍ରମ ଓ ମାଆ ସୋମ୍ବାରୀ ହେମ୍ବ୍ରମ ଖାଇ ପିଇ ସାରି ଶୋଇଥିଲେ। ବିଳମ୍ବିତ ରାତିରେ ରାଜୁ ହେମ୍ବ୍ରମଙ୍କ ତିନି ବନ୍ଧୁ ନିଶାସକ୍ତ ଅବସ୍ଥାରେ ଆସି ରାଜୁ ଘରେ ପହଞ୍ଚିବା ପରେ ରାଜୁ ଓ ତାଙ୍କ ପତ୍ନୀ ତାଙ୍କ ସହ ମିଶି ମଦ ପିଇଥିଲେ। ପରେ ସେମାନଙ୍କୁ ଅତ୍ୟଧିକ ନିଶା ହେବାରୁ ଶିଶୁ ପୁତ୍ରଟି ଶୋଇଥିବା ଅବସ୍ଥାରେ ତା’ଉପରେ ଚଢ଼ି ଯାଇଥିଲେ। ଫଳରେ ଶିଶୁପୁତ୍ରଟିର ଘଟଣା ସ୍ଥଳରେ ପ୍ରାଣ ଚାଲିଯାଇଥିବା କହିଛନ୍ତି ସ୍ଥାନୀୟ ବାସିନ୍ଦା। ମଙ୍ଗଳବାର ଭୋରରୁ ପରିବାର ଲୋକେ ଉଠି ଶିଶୁ ପୁତ୍ରକୁ ଉଠାଇବାବେଳେ ଜାଣିବାକୁ ପାଇଥିଲେ ଯେ, ତା’ର ମୃତ୍ୟୁ ଘଟିଛି। ପରେ ସେମାନେ ତରବରିଆ ଭାବରେ ତାକୁ ନେଇ ସ୍ଥାନୀୟ ଏକ ପରିତ୍ୟକ୍ତ ଜାଗାରେ ପୋତି ଦେଇଥିଲେ। ସ୍ଥାନୀୟ ଯୁବକ ଚୌଦ୍ବାର ପୁଲିସକୁ ଖବର ଦେବାପରେ ପୁଲିସ ପହଞ୍ଚି ବାପା ମାଆଙ୍କୁ ଅଟକ ରଖିବା ସହ ଶିଶୁ ପୁତ୍ର ପୋତା ହୋଇଥିବା ସ୍ଥାନକୁ ହେପାଜତରେ ରଖିଛି। ଏଗ୍ଜିକ୍ୟୁଟିଭ ମାଜିଷ୍ଟ୍ରେଟ ଆସିବା ପରେ ଶିଶୁପୁତ୍ରର ମୃତଦେହକୁ ଖୋଲାଯାଇ ବ୍ୟବଚ୍ଛେଦ ପାଇଁ କଟକ ବଡ଼ ମେଡ଼ିକାଲକୁ ପଠାଯାଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ଶିଶୁ ପୁତ୍ରର ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ମାଜିଷ୍ଟ୍ରେଟ କହିଛନ୍ତି।
Comments are closed.