ମୁମ୍ବଇ: ମୁମ୍ବଇର ଭାଣ୍ଡୁପ ଅଞ୍ଚଳରେ ରାକେଶ ପାୱାର ନାମକ ଜଣେ କ୍ରିକେଟରଙ୍କୁ ହତ୍ୟା କରାଯାଇଛି। ଗୁରୁବାର ରାତି ପ୍ରାୟ ୧୨ଟାରେ ୩ ଜଣ ଦୁର୍ବୃତ୍ତ ରାକେଶଙ୍କୁ ଛୁରାମାଡ଼ କରିବା ସହ ଅନ୍ୟାନ୍ୟ ମାରଣାସ୍ତ୍ରରେ ଆକ୍ରମଣ କରିଥିଲେ। ରାକେଶ ଭାଣ୍ଡୁପର ମହାବୀର ପେଟ୍ରୋଲ ପମ୍ପରେ ଗାଡ଼ିରେ ପେଟ୍ରୋଲ ପକାଇ ଟଙ୍କା ଦେଉଥିବାବେଳେ ଏହି ଆକ୍ରମଣ କରାଯାଇଥିଲା। ଆକ୍ରମଣ ସମୟରେ ରାକେଶ ତାଙ୍କ ବାନ୍ଧବୀଙ୍କ ସହିତ ଏକ ବାଇକରେ କେଉଁଆଡେ ଯିବାକୁ ବାହାରିଥିଲେ। ଖବର ପାଇ ପୁଲିସ ତୁରନ୍ତ ଘଟଣା ସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରିଥିଲା। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।
ରାକେଶ ପେଶାରେ ଜଣେ କ୍ରିକେଟର ଥିଲେ। ଅନେକ ବର୍ଷ ଧରି ସେ ଜିଲାସ୍ତରରେ ଖେଳିଆସୁଥିଲେ। ଏଥିସହ ପିଲାମାନଙ୍କୁ କ୍ରିକେଟ କୋଚିଂ ଦେଉଥିଲେ। ଏହି ଘଟଣାରେ ବାନ୍ଧବୀଙ୍କ ସମ୍ପୃକ୍ତି ଥିବା ସନ୍ଦେହରେ ପୁଲିସ ତାଙ୍କୁ ଅଟକ ରଖି ପଚରାଉଚରା କରୁଛି। ଘଟଣା ପରଠାରୁ ଅଭିଯୁକ୍ତମାନେ ଫେରାର ଅଛନ୍ତି। କୁହାଯାଉଛି ଯେ, ପୁଲିସ ଯେଉଁ ଯୁବତୀଙ୍କୁ ଅଟକ ରଖିଛି ତାଙ୍କ ସହିତ ରାକେଶଙ୍କର ପ୍ରେମ ସମ୍ପର୍କ ରହିଥିଲା। କିନ୍ତୁ ରାକେଶ ପୂର୍ବରୁ ବିବାହିତ ଏବଂ ତାଙ୍କର ୨ଟି ସନ୍ତାନ ଅଛନ୍ତି ବୋଲି ପୁଲିସ ଜାଣିବାକୁ ପାଇଛି।
