ଡେସ୍କ: କର୍ଣ୍ଣାଟକ ବିଧାନସଭା ନିର୍ବାଚନ ଲାଗି ଭୋଟ ଗଣନା ଆସନ୍ତାକାଲି (ମେ ୧୩) ସକାଳ ୮ଟାରୁ ଆରମ୍ଭ ହେବ। ଏଠଲାଗି ସମସ୍ତ ପ୍ରସ୍ତୁତି ଚୂଡାନ୍ତ ହୋଇଛି। ୩୪ଟି ଭୋଟ ଗଣତି କେନ୍ଦ୍ରରେ କଡା ସୁରକ୍ଷା ମଧ୍ୟରେ ମତ ଗଣନା କରାଯିବ। ମେ ୧୦ରେ କର୍ଣ୍ଣାଟକରେ ହୋଇଥିବା ମତଦାନ ନୂଆ ରେକର୍ଡ ସୃଷ୍ଟି କରିଛି ଯେଉଁଥିରେ ୭୩.୧୯% ମତଦାନ ହୋଇଥିଲା। ୨୦୧୮ ବିଧାନସଭା ନିର୍ବାଚନରେ ସେଠାରେ ୭୨.୪୪% ମତଦାନ ହୋଇଥିଲା।
ସୂଚନା ଅନୁଯାୟୀ, ମତ ଗଣନା ସମୟରେ ମାନକ ପରିଚାଳନା ପ୍ରକ୍ରିୟା ଅନୁସରଣ କରାଯିବ। ମତ ଗଣନା ଆରମ୍ଭ ହେବା ପୂର୍ବରୁ ଇଭିଏମ ଗୁଡିକୁ ସମସ୍ତ ରାଜନୈତିକ ଦଳର ପ୍ରତିନିଧି, ରିଟର୍ଣ୍ଣିଙ୍ଗ ଅଫିସର ଓ ନିର୍ବାଚନ କମିଶନ ପ୍ରତିନିଧିଙ୍କ ଉପସ୍ଥିତିରେ ଟେବୁଲକୁ ଅଣାଯାଇ ଗଣନା ହେବା ସହ ଭିଭିପାଟର ପେପର ସ୍ଲିପ ମଧ୍ୟ ଗଣାଯିବ। ମତ ଗଣନା କେନ୍ଦ୍ରରେ ତ୍ରିସ୍ଥରୀୟ ସୁରକ୍ଷା ବ୍ୟବସ୍ଥା ସହ ସିସିଟିଭି ମାଧ୍ୟମରେ ସମସ୍ତ ପ୍ରକ୍ରିୟା ରେକର୍ଡ କରାଯିବ।
