ପିପିଲି :ଭୁବନେଶ୍ୱର-ପୁରୀ ଜାତୀୟ ରାଜପଥର ମଙ୍ଗଳପୁର ପେଟ୍ରୋଲ ଟାଙ୍କି ନିକଟରେ ଏକ ଚଳନ୍ତା ଅଟୋରିକ୍ସା ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡିବା ଫଳରେ ସେଥିରେ ଥିବା ୩ଜଣ ମହିଳାଙ୍କ ସମେତ ଚାଳକ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ୨ଜଣଙ୍କର ଅବସ୍ଥା ଗୁରୁତର ଥିବା ସୂଚନା ମିଳିଛି।
ପ୍ରାପ୍ତ ସୂଚନା ଅନୁଯାୟୀ ବାଙ୍କି ଅଞ୍ଚଳର ଏକ ପରିବାରର ୩ଜଣ ମହିଳା ଓ ଜଣେ ପୁରୁଷ ଏକ ଅଟୋରିକ୍ସାରେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦର୍ଶନ କରିବାକୁ ପୁରୀ ଯାଉଥିବା ବେଳେ ଦୁର୍ଘଟଣାର ଶିକାର ହୋଇଥିଲେ।
ମଙ୍ଗଳପୁର ପେଟ୍ରୋଲ ଟାଙ୍କି ଅତିକ୍ରମ କରିବା ପରେ କୌଣସି କାରଣରୁ ଅଟୋଟି ଭାରସାମ୍ୟ ହରାଇ ରାସ୍ତା ଉପରେ ଓଲଟି ପଡିଥିଲା। ଫଳରେ ଅଟୋ ଚାଳକଙ୍କ ସମେତ ସେଥିରେ ଥିବା ଜଣେ ଯୁବତୀ ଓ ୨ଜଣ ମହିଳା ଆହତ ହୋଇଥିଲେ। ଯୁବତୀଙ୍କ ଗୋଡରେ ଗୁରୁତର ଆଘାତ ଲାଗିଥିବା ବେଳେ ଜଣେ ମହିଳାଙ୍କ ମୁଣ୍ଡରେ ଆଘାତ ଲାଗିଥିଲା ଓ ଅନ୍ୟଜଣେ ମହିଳା ବେହୋସ ହୋଇ ପଡିଥିଲେ।
ଖବର ପାଇ ରାଜପଥ ପେଟ୍ରୋଲିଂ ପୁଲିସ ଟିମ୍ର ଏସ୍ଆଇ ରାମକୃଷ୍ଣ କର ସେଠାରେ ପହଞ୍ଚି ସ୍ଥାନୀୟ ଲୋକଙ୍କ ସହଯୋଗରେ ସମସ୍ତ ଆହତଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ଗୁରୁତର ଥିବା ୨ଜଣଙ୍କୁ ପରେ ସେଠାରୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଦୁର୍ଘଟଣାଗ୍ରସ୍ତ ଅଟୋରିକ୍ସାକୁ ପିପିଲି ପୁଲିସ ଜବତ କରିବା ସହ ଘଟଣାର ତଦନ୍ତ ଜାରି ରଖିଛି।
Comments are closed.