ସମାଜ ପୋର୍ଟାଲ ଡେସ୍କ: କରୋନା ଭୂତାଣୁ ସଂକ୍ରମଣ ପରିପ୍ରେକ୍ଷୀରେ ସିଙ୍ଗାପୁର ନଯିବା ପାଇଁ ଭାରତ ସରକାରଙ୍କ ପକ୍ଷରୁ ନାଗରିକମାନଙ୍କୁ ପରାମର୍ଶ ଦିଆଯାଇଛି। ନିହାତି ଜରୁରୀ କାମ ନଥିଲେ ଭାରତୀୟମାନେ ସିଙ୍ଗାପୁର ନ ଯିବା ପାଇଁ ସରକାରୀ ଭାବେ ଭାରତୀୟମାନଙ୍କୁ ପରାମର୍ଶ ଦିଆଯାଇଛି। ଆସନ୍ତାକାଲିଠାରୁ ନେପାଳ, ଇଣ୍ଡୋନେସିଆ, ଭିଏତନାମ, ମାଲେସିଆ ଆଦି ଦେଶରୁ ଭାରତ ଆସୁଥିବା ବିମାନ ଯାତ୍ରୀମାନଙ୍କୁ ବିମାନ ବନ୍ଦରରେ ପରୀକ୍ଷା କରାଯିବ। ଏବେ ଚୀନ, ହଂକଂ, ଥାଇଲାଣ୍ଡ, ଦକ୍ଷିଣ କୋରିଆ, ସିଙ୍ଗାପୁର ଏବଂ ଜାପାନରୁ ଆସୁଥିବା ବିମାନ ଯାତ୍ରୀମାନଙ୍କୁ ୨୧ଟି ନିର୍ଦ୍ଧାରିତ ବିମାନ ବନ୍ଦରରେ ପରୀକ୍ଷା କରାଯାଉଛି। ସେମାନେ କରୋନା ଭୂତାଣୁରେ ସଂକ୍ରମିତ କି ନୁହେଁ, ତାହା ନିର୍ଦ୍ଧାରଣ କରାଯାଉଛି।
ଏ ନେଇ କ୍ୟାବିନେଟ୍ ସଚିବଙ୍କ ଅଧ୍ୟକ୍ଷତାରେ ଏକ ବୈଠକ ନୂଆଦିଲ୍ଲୀରେ ଅନୁଷ୍ଠିତ ହୋଇଯାଇଛି। ଏଥିରେ କରୋନା ଭୂତାଣୁ ସଂକ୍ରମଣର ସ୍ଥିତି ଓ ଭାରତୀୟମାନଙ୍କ ନିରାପତ୍ତା ନେଇ ସମୀକ୍ଷା କରାଯାଇଛି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ କହିଛନ୍ତି ଯେ ସରକାରଙ୍କ ବ୍ୟାପକ ତଦାରଖ ବ୍ୟବସ୍ଥା ଓ ପଦକ୍ଷେପ ଯୋଗୁଁ ଭାରତ କରୋନା ସଂକ୍ରମଣରୁ ଏଯାଏ ସୁରକ୍ଷିତ ରହିଛି। ଏବୋଲା, ନିଫା ଓ ସ୍ୱାଇନ୍ଫ୍ଲୁ ଭଳି ରୋଗର ମୁକାବିଲା କରିବା ପାଇଁ ଅତୀତରେ ଭାରତୀୟ ଚିକିତ୍ସକ, ଚିକିତ୍ସା କର୍ମଚାରୀ ଓ ଅନ୍ୟ ସଂପୃକ୍ତ ପକ୍ଷ ଯେଉଁଭଳି ଭାବେ ତତ୍ପରତା ପ୍ରକାଶ କରିଥିଲେ, ଏଥର ମଧ୍ୟ ସେହିଭଳି ତତ୍ପରତା ଦେଖାଇଛନ୍ତି ବୋଲି ସେ କହିଛନ୍ତି। ଗତକାଲି ମୁମ୍ବାଇଠାରେ ଆନ୍ତର୍ଜାତିକ ଲୋକସଂଖ୍ୟା ବିଜ୍ଞାନ ପ୍ରତିଷ୍ଠାନର ଭିତ୍ତିପ୍ରସ୍ତର ସ୍ଥାପନ ଉତ୍ସବ ଅବସରରେ ସେ କହିଛନ୍ତି ଯେ ଭାରତ ଏବେ ସମସ୍ତଙ୍କ ପାଇଁ ସ୍ୱାସ୍ଥ୍ୟ ଯୋଗାଣ ନୀତିକୁ ସଂପୂର୍ଣ୍ଣ ଭାବେ ସଫଳ କରିବା ସ୍ଥିତିରେ ପହଞ୍ଚିଛି। ବିଶ୍ୱ ସ୍ୱାସ୍ଥ୍ୟ ସଂଗଠନର ମାନକ ଅନୁସାରେ ଭାରତ ଏ ଦିଗରେ କାର୍ଯ୍ୟ କରୁଛି। ଖୁବ୍ କମ୍ ଦିନରେ ଜନସଂଖ୍ୟା ଅନୁପାତରେ ଦେଶରେ ଯେତେ ଡାକ୍ତର ରହିବା କଥା, ସେ ଲକ୍ଷ୍ୟ ପୂରଣ କରାଯିବ ବୋଲି ସେ ସୂଚନା ଦେଇଛନ୍ତି।
