ତିଗିରିଆ: ଗଦାଧରପୁର ନୋଡ଼ାଲ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ସଂଗୃହିତ ୧୮୫ଜଣଙ୍କ ସ୍ୱାବର ଆଣ୍ଟିଜେନ ପରୀକ୍ଷାରେ ୩୩ଜଣଙ୍କର ପଜିଟିଭ ରିପୋର୍ଟ ଆସିବା ପରେ ସ୍ୱାସ୍ଥ୍ୟ ବିଭାଗ ପକ୍ଷରୁ ସେମାନଙ୍କୁ ଚିହ୍ନଟ କରାଯାଇ କୋଭିଡ଼ ହସ୍ପିଟାଲକୁ ପଠାଇବାରେ ଉଦ୍ୟମ ଜାରି ରହିଥିବା ଜଣାପଡ଼ିଛି। ବିନ୍ଧାଣିମା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଭାରପ୍ରାପ୍ତ ଅଧୀକ୍ଷକ ଡାକ୍ତର ବିଶ୍ୱ ବିକାଶ ରାଉତରାୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବିଭାଗୀୟ କର୍ମଚାରୀ ମନମୋହନ ଦାସ ଏବଂ ତ୍ରିଲୋଚନ ବାରିକ ଗାଁକୁ ଗାଁ ବୁଲି ସମ୍ପୃକ୍ତ ଅଞ୍ଚଳର ଆଶା, ଅଙ୍ଗନବାଡ଼ି ଏବଂ ସ୍ୱାସ୍ଥ୍ୟକର୍ମୀଙ୍କ ସହଯୋଗରେ କରୋନା ପଜିଟିଭ ଚିହ୍ନଟ ବ୍ୟକ୍ତି ବିଶେଷଙ୍କୁ ଚିହ୍ନଟ କରି କୋଭିଡ଼ ହସ୍ପିଟାଲକୁ ପଠାଇଛନ୍ତି।
ରିପୋର୍ଟ ଲେଖାହେବା ସୁଦ୍ଧା ଗଦାଧରପୁର ପଞ୍ଚାୟତ ଅନ୍ତର୍ଗତ ସାନନାଉପୁଟରୁ ଜଣେ, କଳିବିରରୁ ୫, ମାନପୁରରୁ ୭, ରଘୁରାମପୁରରୁ ୪, ହରିଶରଣପୁରରୁ ୩ ଏବଂ ଅନ୍ୟ ପଞ୍ଚାୟତ ଅଚଳକୋଟରୁ ୩ଜଣ ଏହିପରି ୨୩ଜଣଙ୍କୁ ମାଧବପୁରସ୍ଥିତ ଜିମ୍ସାର କୋଭିଡ଼ ହସ୍ପିଟାଲକୁ ପଠାଇ ଦିଆଯାଇଥିବା ବରିଷ୍ଠ ସ୍ୱାସ୍ଥ୍ୟ ପରିଦର୍ଶକ ଶ୍ରୀ ବାରିକଙ୍କ ଠାରୁ ପ୍ରକାଶ। ଏହି କାର୍ୟ୍ୟରେ ପୁରୁଷ ସ୍ୱାସ୍ଥ୍ୟ କର୍ମୀ ଦିଲ୍ଲୀପ କୁମାର ପଣ୍ଡା, କାଳିଚରଣ ଦାସ, ମଞୁଳା ଦେଇ, ଶାସ୍ୱତୀ ସେଠ ପ୍ରମୁଖ ସହଯୋଗ କରିଥିଲେ।
