ଭୁବନେଶ୍ବର: ସାଧାରଣ ନିର୍ବାଚନକୁ ନେଇ ରାଜ୍ୟ ରାଜନୀତି ଏବେ ସରଗରମ। ବିଜେଡି, ବିଜେପି ଏବଂ କଂଗ୍ରେସ ମଧ୍ୟରେ ଚାଲିଛି ଛକାପଞ୍ଛା। ପ୍ରଚାରରେ ମାଇଲେଜ୍ ନେବା ପାଇଁ ସବୁ ଦଳ ଆପଣାଉଛନ୍ତି ଭିନ୍ନ କୌଶଳ। ବିଜେଡି ଏହାର ସୁପ୍ରିମୋ ନବୀନ ପଟ୍ଟନାୟକଙ୍କୁ ପ୍ରଚାର ମଇଦାନକୁ ଓହ୍ଲାଇବାକୁ ଯୋଜନା କରିଥିବାବେଳେ ବିଜେପି ପକ୍ଷରୁ ଆସନ୍ତା ୨୫ ତାରିଖରେ କେନ୍ଦ୍ରମନ୍ତ୍ରୀ ଅମିତ ଶାହ ଓଡ଼ିଶା ଆସି ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିବେ। ତେବେ ଏହି ଦୁଇ ହେଭିୱେଟ୍ଙ୍କ ପ୍ରଚାରକୁ ନଜରରେ ରଖି କଂଗ୍ରେସ ଆରମ୍ଭ କରିଛି ଏକ ସ୍ବତନ୍ତ୍ର କାର୍ଯ୍ୟକ୍ରମ, ଯାହାର ନାଁ ଦେଇଛି ‘ପାନ ଭଣ୍ଡାର’ ।
ମାଷ୍ଟରକ୍ୟାଣ୍ଟିନସ୍ଥିତ କଂଗ୍ରେସ ଭବନ ନିକଟରେ ମଙ୍ଗଳବାର ଏହି ପାନ ଭଣ୍ଡାର କାର୍ଯ୍ୟକ୍ରମ ଶୁଭାରମ୍ଭ କରିଛି ଦଳ। କେନ୍ଦ୍ରରେ ବିଜେପି ସରକାର ଏବଂ ରାଜ୍ୟରେ ବିଜେଡି ସରକାର ଓଡ଼ିଶାବାସୀଙ୍କୁ ଦୁର୍ନୀତିର ପାନ ଖୁଆଇ ଲୁଟୁଛନ୍ତି ବୋଲି ଦଳ ଅଭିଯୋଗ କରିଛି। ନିର୍ବାଚନୀ ବଣ୍ଡ, ଖଣି, କୋଭିଡ୍, ଚାରାରୋପଣ ଆଦି କ୍ଷେତ୍ରରେ ଦୁର୍ନୀତି କରି ଉଭୟ ସରକାର ଲକ୍ଷ ଲକ୍ଷ କୋଟି ଟଙ୍କା ହଡ଼ପ କରିଥିବା କୁହାଯାଇଛି। ଏଥିରେ କଂଗ୍ରେସର ଓଡ଼ିଶା ପ୍ରଭାରୀ ଅଜୟ କୁମାର, କଟକ ଜିଲା କଂଗ୍ରେସ କମିଟି ସଭାପତି ମାନସ ଚୌଧୁରୀ ପ୍ରମୁଖ ଯୋଗଦେଇଥିଲେ। ଏହି କାର୍ଯ୍ୟକ୍ରମ ଜରିଆରେ ବିଜେପି ଓ ବିଜେଡି ସରକାରଙ୍କ ଦୁର୍ନୀତି ବିଷୟରେ ଜନସାଧାରଣଙ୍କୁ ସଚେନତ କରାଇବାକୁ ଉଦ୍ୟମ କରାଯାଇଥିବା ନେତାମାନେ କହିଛନ୍ତି।
