ନୂଆପଡ଼ା: ଉପନିର୍ବାଚନ ଯେତେ ପାଖେଇ ଆସୁଛି ବିଭିନ୍ନ ଦଳରେ ମିଶ୍ରଣ ପର୍ବ ସେତେ ଅଧିକ ହେଉଛି। ଏହି କ୍ରମରେ ଆଜି ନୂଆପଡ଼ା ଜିଲ୍ଲା ସଦର ମହକୁମା ଏବିଟି ସମ୍ମିଳନୀ କକ୍ଷରେ କଂଗ୍ରେସ ଦଳ ପକ୍ଷରୁ ଏକ ମିଶ୍ରଣ ପର୍ବ ଆୟୋଜନ କରାଯାଇଥିଲା। ଏହି ଅବସରରେ ପ୍ରଦେଶ କଂଗ୍ରେସ କମିଟି ସଭାପତି ଭକ୍ତ ଚରଣ ଦାସଙ୍କ ଉପସ୍ଥିତିରେ ସଦର ମହକୁମାର ପ୍ରାୟ ୪୦ରୁ ୫୦ ଜଣ ଯୁବକ ଜାତୀୟ କଂଗ୍ରେସରେ ଯୋଗଦାନ କରିଥିଲେ। ଏହି ଅବସରରେ ରାଜଗାଙ୍ଗପୁରର ବିଧାୟକ ରାଜନ୍ ଏକ୍କା ନୂଆପଡ଼ାର ବିଧାୟକ ପ୍ରାର୍ଥୀ ଘାସିରାମ ମାଝୀ, ଯୁବ ନେତା ରବି ମଙ୍ଗରାଜ ଅଙ୍କିତ ସିଂହାଇ, ପବନ ଶର୍ମା, ନୂଆପଡ଼ା ପାଇଁ କଂଗ୍ରେସ ପ୍ରଭାରୀ ମୁରଲୀ ନାଏକ ପ୍ରମୁଖ ଉପସ୍ଥିତ ଥିଲେ।
ଏହି ପରିପ୍ରେକ୍ଷୀରେ ପିସିସି ସଭାପତି ଭକ୍ତ ଦାସ ଉଭୟ ବିଜେପି ବିଜେଡ଼ିକୁ ଆକ୍ଷେପ କରି ଉଭୟ ଦଳକୁ ଲାଜ ଲାଗିବା କଥା କହିଥିଲେ। ଏହା ଛଡ଼ା ବିଜେପିକୁ ପ୍ରାର୍ଥୀ ମିଳିଲା ନାହିଁ ସେମାନେ ବିଜେଡିର ଘୋଷିତ ପ୍ରାର୍ଥୀକୁ ଘୋଡ଼ା ବେପାର କରି ନିଜ ଦଳରେ ସାମିଲ କରିଛି। ବିଜେଡି ମଧ୍ୟ ବିଜେପିର ବି ଦଳ ଭାବରେ ନିଜ ପ୍ରାର୍ଥୀଙ୍କୁ ବିଜେପି ହାତକୁ ଟେକି ଦେଇ ଜାତୀୟ କଂଗେସ ପ୍ରାର୍ଥୀ ଘାସିରାମ ମାଝୀ ଙ୍କୁ ହରାଇବା ପାଇଁ ଟୋକନ୍ ପ୍ରାର୍ଥୀ ଦେବ ବୋଲି କହିଥିଲେ। ଏହି ଅବସରରେ ଭକ୍ତ ବାବୁ ନୂଆପଡ଼ାରେ ସ୍ଥିର ରାଜନୀତି କରିବାକୁ ଆହ୍ବାନ ଦେଇଥିଲେ।
