ଡେସ୍କ: ରାଜନୀତିରେ ବିରୋଧାଭାସ ଓ ଅସୁୟାଭାବ ରହିବା ଏକ ପ୍ରକାର ସ୍ୱାଭାବିକତା ବୋଲି ଗ୍ରହଣ କରାଯାଏ। ବିଶେଷ କରି କେନ୍ଦ୍ର ସରକାର ରାଜନୈତିକ ଦୃଷ୍ଟିକୋଣକୁ ବିଚାରକୁ ନେଇ ଯେଉଁ ପ୍ରଦେଶରେ ଭିନ୍ନ ଦଳର ସରକାର ଥାଏ ସେଠାକୁ ନିଜ ଦଳର ବରିଷ୍ଠ ନେତାଙ୍କୁ ରାଜ୍ୟପାଳ କରି ପଠାଇଥାନ୍ତି। ଆମ ଦେଶରେ ପଶ୍ଚିମବଙ୍ଗ ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ମଧ୍ୟରେ ଥିବା ବିବାଦ ଓ ଦିଲ୍ଲୀ ଉପରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ମଧ୍ୟରେ ବିଭିନ୍ନ ସମୟରେ ଦେଖାଯାଉଥିବା ବିବାଦ ଅନେକ ସମୟରେ ରାଜନୈତିକ ସଙ୍କଟ ସୃଷ୍ଟି କରିଛି।
ତେବେ ଆଜି ଏଭଳି ଏକ ଘଟଣା ଦେଖିବାକୁ ମିଳିଛି ଯେଉଁଥିରେ କେବଳ ସମ୍ମାନ ନୁହେଁ ବରଂ ରାଜନୀତିରୁ ଉର୍ଦ୍ଧ୍ୱରେ ରହି ରାଜ୍ୟପାଳ ଭଳି ଏକ ରାଜନୈତିକ ସାମ୍ବିଧାନିକ ପଦବୀରେ ଥିବା ରାଜ୍ୟପାଳଙ୍କ ପ୍ରତି ଥିବା ଅତୁଟ ବିଶ୍ୱାସ ପ୍ରଦର୍ଶନ କରାଯାଇଛି। ବିଦାୟୀ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନଙ୍କୁ ଗନ୍ନବରମ ବିମାନ ବନ୍ଦର ଯାଏଁ ଛାଡିବାକୁ ଯାଇଥିଲେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇ ଏସ ଜଗନ ମୋହନ ରେଡ୍ଡୀ। ସେଠାରେ ରାଜ୍ୟପାଳ ହରିଚନ୍ଦନ ବିମାନ ମଧ୍ୟକୁ ପ୍ରବେଶ କରିବାକୁ ଯାଉଥିବା ବେଳେ ମୁଖ୍ୟମନ୍ତ୍ରୀ ଜଗନ ମୋହନ ନଇଁ ପଡି ଜଣେ ଛାତ୍ର ଭଳି ରାଜ୍ୟପାଳଙ୍କ ପାଦ ସ୍ପର୍ଶ କରିଥିଲେ।
ଛତିଶଗଡ଼ର ରାଜ୍ୟପାଳ ଭାବେ ନୂଆ ଦାୟିତ୍ୱ ଗ୍ରହଣ କରିବା ପୂର୍ବରୁ ଗତକାଲି ବିଶ୍ଵଭୂଷଣଙ୍କୁ ଆନ୍ଧ୍ରପ୍ରଦେଶ ସରକାର ବିଦାୟ ସମ୍ବର୍ଦ୍ଧନା ଦେଇଥିଲେ। ତେବେ ମୁଖ୍ୟମନ୍ତ୍ରୀ ଜଗନ ମୋହନ ରାଜ୍ୟପାଳଙ୍କ ପାଦ ସ୍ପର୍ଶ କରି ରାଜନୀତିରେ ସଂସ୍କାର ଏବେ ମଧ୍ୟ ବଞ୍ଚିରହିଥିବା ପ୍ରମାଣ କରିଥିବା ବିଭିନ୍ନ ରାଜନୈତିକ ଦଳର ନେତାମାନେ କହିଛନ୍ତି।
Comments are closed.